開放世界喪屍生存大作《State of Decay 2》邊走佬邊種野好忙碌!

大家係咪都有成年無試過比喪屍追呢?黎緊今個月就有隻萬眾期待既喪屍遊戲《State of Decay 2》,遊戲不但係開放世界,而且有別於以往喪屍遊戲。遊戲內加入大量生存要素,即係要搵糧食補給,又要起屋整電器等等,講求既係大家合作先可以係呢個世界生存落去,真係諗都好玩!

 

《State of Decay 2》採用第三身視點,遊戲目的就係要玩家係呢個喪屍肆虐既世界內,同其他人合作求生。遊戲內擁有極多有自己獨特個性同能力既角色比大家玩,根據官方資料就有成千位角色。由於每位角色都有自己既故事同出身背景,所以佢地都會有自己獨特既專長及特質。遊戲內玩家需要興建基地,而呢堆角色都會有用到佢既崗位。

 

例如 Tiffany 就係一位有園藝技能既生存者,即係話佢可以種植植物,亦即係可以製造食物。但係要種野就需要有種子,係呢個時候就需要有較強生存能力既角色去鎮度拎種子返基地。另外仲有好多其他特殊角色,例如係有機械相關知識既人就可以維修機器等等。

 

 

 

就咁睇個基地梗係越多人越好?事實又唔係絕對。因為當基地多人既時候,食物消耗就會加速,而且會影響士氣。一旦士氣低落,不但會影響工作既速度,最弊既係會有機會病甚至係暴動!

另外總所周知,喪屍呢味野對聲音就非常敏感既,所以係遊戲入面會有一個噪音值,如果建造基地設施太大聲既話,就會引堆喪屍埋黎,係咪好真實呢!

 

《State of Decay 2》必需連線遊玩,咁聰明既讀者睇到呢度就一定估到,有自己基地即係人地都會有基地啦!無錯,遊戲將會有好多唔同既基地,大家可以透過完成任務又或者交換資源黎加強友好度,又或者唔妥佢既咪搞事囉。但係記住唔係多人就等於好,因為糧食供給係非常重要既一環,睇黎都係唔好搞事好……。

 

《State of Decay 2》將於 5 月 22 日推出,支援 4K HDR 輸出(而家 Xbox One S 咁平,抵玩阿),平台為 Xbox One / Windows 10,並且支援 Xbox Play Anywhere 跨平台遊玩。另外呢隻遊戲亦都會加入 Xbox Game Pass 行列,即係玩家只要比固定月費,就可以任玩過百款精選遊戲。

 

 

森麻

Avatar VJGamer總編,細細個已經蒲機舖,機齡甚深,熱愛電玩文化。

追蹤

Facebook 更多文章