餓左《惡魔城》新作好耐嘅我，終於拎到手機版 《悪魔城ドラキュラ Grimoire of Souls》嘅 Beta嚟試。開初試玩第一個感受一定係覺得遊戲畫面比以往嘅高出好多，而且角色操作嘅流暢度亦遠超一般手機動作遊戲質素！

每把武器都有技能可以使用，配合得啱嘅話初期都可以有咁爽嘅基本連技

玩家可以有兩個角色帶入關卡互換

武器分主武、副武同輔助道具，每把武器都有技能可以發動，主武係負責普通攻擊，副武就只係提升數值，而輔助道具技能就要消耗MP先可以使用。

防具亦分左主同副，除左主防具會顯示喺角色身上之外，暫時未見到主同副嘅分別。

每個角色都有專屬同通用武器，防具就再分通用同男、女裝，所以選角同抽裝嘅時候就要留意

每個角色嘅技能樹係長到掃兩三下先到底，幸好每個角色技能點都係獨立，唔洗每個角色逐個升

換 Skin 唔只換個樣，角色數值都有加乘

有時返到大廳，角色仲會變下其他型態出現

而遊戲喺呢個 Beta 可以玩到嘅關卡都唔少，主線關卡每章有 4 節，頭 3 節有 5 版，而最後就係 Boss 關卡。除左自己 Solo 仲可以同朋友一齊挑戰，而每關都有 3 個勝利條件，完成之後你就可以唔洗入關打直接用體力換素材(類似大陸啲手機 Game 咁唔洗入關，直接撳個「掃蕩」打素材)。

暫時都只係打到第三章

關數都唔少，而且啲怪物種類都多

第一章 Boss 係經典大蝙蝠

等同伴一齊挑戰

關卡中仲有惡魔城好標志性嘅隱藏道具，次次位置都唔同

同 AI 一齊打，多數都比佢拉到打唔晒怪就完關

開左「掃蕩」之後就連 Boss 關都唔洗入去打

除左主線可以玩之外，仲有副本同埋 BossRush 兩個模式

副本暫時開左兩章，一個係打素材升武器同防具，另一個就係升角色 Lv.

BossRush 就係四人合力打 Boss

暫時成個 Beta 中最爽最好玩嘅模式，而且 Boss 都唔係企喺度任你打，當中有一定難度

雖然完成第 2 章之後 PVP 嘅 Battle Arena 會開放，但非常難組隊PVP，所以暫時未試到。

如果係過下《惡魔城》嘅手癮的話，呢個 Beta 已經比到玩家極大嘅滿足感。只係喺遊戲營運模式上同一啲大陸出品嘅手機遊戲非常相似 (差在冇「自動打怪」同 「VIP 身份」)，幸而佢除左抽專屬武裝之外，其他好似 角色、Skin、技能解封等等，都可以慢慢喺遊戲中打得到，但係 PVP 模式就好大機會變左神裝課長天下。

《惡魔城》 Fans 到正式版推出之後，玩過下再考慮落唔落坑囉！