【七月巨作】Switch 多路線 RPG《OCTOPATH TRAVELER》點解令人咁期待?

如果你同我一樣鍾意玩 JRPG,唔知呢排會唔會同我有同樣感覺,就係好似係咩新選擇咁?今日寫嘅呢隻《OCTOPATH TRAVELLER》,其實就唔係第一次介紹比大家架啦,喺佢剛剛發佈嘅時候都稍微同大家推過(詳見【內文】)

不過,點解今日又拎返出黎講呢?因為早前釋出嘅消息唔算多,不過距離遊戲正式推出日子越近,遊戲嘅全貌包括試玩版以外嘅其他主線角色,官方都慢慢放緊更多資料出黎!

正如之前同大家分享嘅一樣,遊戲由 Square Enix 研發,雖然而家咩 Game 都追求畫面同像真,不過,依然有一班 RPG 愛好者好想延續 2D 粒粒人畫風嘅傳統,再融合當代嘅特技,嘗試帶比玩家新嘅感受。

遊戲特色莫過於多線發展,同一個劇本同世界觀,用八個角色嘅視點去演譯各自唔同嘅故事;而喺遊戲中,呢班角色亦會隨住故事推進而有所交集,呢種多角度描寫故事嘅手法,係我覺得遊戲值得期待嘅主因!

另外,遊戲喺場景、畫面、音效方面都做得非常用心,有玩過遊戲 Demo 嘅朋友應該都知道,Game 入面算係採取 Semi Open World 設定,而每個場景嘅製作精細,都令玩家一見難忘。

八個角色嘅攻擊方式同技能都唔同,而因為遊戲中仲有一個好有趣嘅設定,就係可以帶 NPC 出去幫手打,或者同佢地互動等等;所以連啲 NPC 嘅能力都係有好多變化的 LOL 真係少啲心機都整唔掂~

《OCTOPATH TRAVELER》正式推出時間為 2018 年 7 月 13 日,對應平台為 Switch,目前已知對應語言為日文及英文,中文化消息有待公佈!到遊戲推出時,大家應該都玩完《Dark Souls Remastered》了(笑)或者到時可以考慮下玩 SE 社呢隻誠意之作喔!

遊戲試玩版在 Nintendo e-Shop 上面免費開放下載中。

神婆

神婆 非典型占卜師,唔神秘,無形象,除了鐘意聽客人講故事,夜間興趣係打機睇動漫同玩貓;日系遊戲及 JRPG 專攻!

追蹤

Facebook 更多文章