PUBG 發火!《絕地求生 PUBG》正式控告《要塞英雄 Fortnite》開發商侵權!

係香港雖然大家都主要都係玩《絕地求生 PUBG》食雞,但係歐美地區由 Epic Games 開發既《要塞英雄 Fortnite》勢頭早就超越咗《PUBG》,正式成為大逃殺類型一哥。而且《Fortnite》仲計劃同另一廠商 Neowiz Games 合作,目標係打入《PUBG》大本營韓國,面對住步步進逼,《PUBG》開發商 Bluehole 旗下子公司 PUBG.corp,正式係上週五對美國遊戲開發商 Epic Games 旗下大逃殺競技遊戲《Fortnite》提出侵權控告,並申請對《Fortnite》頒下禁制令。

 

呢個時候幫大家回返少少帶,係 2017年 3月尾《PUBG》係 Steam 度正式開始搶先體驗,新穎而且完整既大逃殺玩法大受歡迎,係三個月內已經賣超過 400 萬套,而且由舊年 8 月到而家,依然係 Steam 上面最多玩家人數既遊戲。

 

 

挾住強勁既人氣,《PUBG》黎到今年各平台加埋已經接近賣出 4,000 萬套,都未計手機版強勁既勢頭。但係自從 Epic Games 開發既《Fortnite》舊年加入大逃殺玩法並且以免費形式推出之後,明顯地吸引咗好多原本玩《PUBG》既人轉會,導致同時在線人數每月明顯下降。

《Fortnite》由於遊戲加入獨有既建造系統、更快速遊戲節奏,不但令普通玩家加入,連各大直播主甚至明星都加入玩埋一份,直到而家係歐美地區氣勢無人能及,而且截至四月遊戲營收已經突破 2.9 億美元,真正達到名利雙收。

外國直頭有人批評「Fortnite 現象」令小孩變成怪獸 (EuroGamer)

 

 

事態發展到而家就睇法院點裁決,不過有趣既係另一隻大逃殺遊戲《H1Z1》就無比 PUBG.corp 告,無他既,無威脅嘛。

五木

動漫電玩宅,極愛金田一系列,擅長動作及策略遊戲

追蹤

更多文章