【報捷】亞運電競項目資格賽結果出爐 香港隊表現神勇連下四城!

當大家掛住睇世界盃既時候,另一觸目體育盛事印尼雅加達亞運會電子競技項目終於有消息!代表香港出戰既香港隊表現神勇,係其中四個比賽項目裡面擊敗各地好手,勇奪雅加達入場券,勁丫!

 

今屆亞運電競屬示範項目賽事,六款比賽項目分別為《英雄聯盟》、《傳說對決》、《部落衝突:皇室戰爭》、《星海爭霸 II》、《爐石戰記》及《PES2018》。參賽國家分成五個賽區進行預賽,我地香港就屬於東亞賽區。雖然有唔少小道消息流出,但係官方消息係今日下午先正式公布。

 

 

香港隊分別係《傳說對決》、《部落衝突:皇室戰爭》、《爐石戰記》及《PES2018》取得出線資格,可惜賽前最為備受關注,由前《英雄聯盟》世界冠軍 Toyz 擔任教練既港隊,不敵首名出線既韓國(8 勝 2 負);次名中華台北及中國,以 3 勝 7 負既成績,排第四名,出線無望。

另一大熱項目《傳說對決》,可謂荊棘滿途,一開始已經對上台灣、中國、韓國等強隊。雖然頭二場都不敵對手(台灣隊以全勝姿態奪得首名出線),但係憑住香港隊驚人鬥志,係第三場戰勝公認既強敵韓國隊!最後港隊憑住強勁既氣勢戰勝埋澳門隊,以 2勝 2負成績獲得前往印尼決賽名額。

至於《爐石戰記》香港隊代表 Kin0531 係賽事表演突出,以全取 5 分佳績得到首名出線資格,力壓來自中國、蒙古、韓國、台灣、日本及澳門既選手。

《部落衝突:皇室戰爭》及《PES 2018》二個項目香港隊同樣取得次名出線,至於《星海爭霸 II》香港隊以一分之差,位列第三名,居於台灣之後,無緣出線。

印尼雅加達亞運會電子競技項目詳細賽果傳送門

About 五木

五木 動漫電玩宅,極愛金田一系列,擅長動作及策略遊戲

Connect

View all Posts