求生遊戲大家玩得多，無論係玩災難後嘅《絕體絕命都市》系列，抑或野人文明進化（笑）嘅《Ark: Survival》，點樣喺絕境中活命，一向都係玩家熱愛嘅題材。

今次介紹呢隻《JUST US》由瑞典獨立遊戲工作室「Dry Eel Development」開發，雖然遊戲目前仲係初步階段，但係目前公佈嘅劇本以及多樣玩法，已經引起唔少海外玩家注意。

故事以全球暖化作為背景，主角為一對受到水位上漲而困於荒島嘅情侶，到底隨住探索呢個島，佢地可以搵到幾多資源令自己生存落去呢？

食：釣魚

食：自己種

食：唔知點解有槍可以玩射鵰英雄傳（誤）

住：要自己搵各式資源

屋：自己起，玩法好似《Ark》但係材質同埋視點正常好多！

原本一對主角以為自己可以因此而過住田園歸隱嘅生活，不過，正因為無左新聞睇，玩家係唔會知出面世界其他地方到底出現咩野災害、而呢啲災害又會對你現有嘅生活造成乜野潛伏嘅影響！而遊戲入面，既然話左係全球暖化，所以氣候變化係好反常的，有時會日照短，有時會好鬼凍，點樣令自己快速適應氣候變化而改變生活方針，都係遊戲嘅挑戰之一。

玩家勁嘅可以整船嘗試去其他地方

同居生活（？）可以考慮養寵物添架

無錯！既然主角係一對情侶，所以遊戲係可以兩個人 Coop 上網玩的，不過就無 PVP，淨係求生 Play，唔駛打其他 Online 玩家；遊戲工作室嘅講法係「因為我地淨係鍾意玩 Coop 囉」咁樣，都幾有性格……

工作室有性格嘅地方唔止呢一點，因為一般獨立遊戲都會集資，不過佢地就話「唔要呀，唔駛比錢我，鍾意嘅就宣傳個遊戲，唔鍾意嘅就唔好玩」咁樣，串嘴到不得了（笑）；遊戲目前淨係對應英文 及 PC 平台，未知會唔會有進一步移植落其他 Console 嘅打算，預計今年內或下年年頭……總之整完就會推出市面！LOL

雖然好串嘴，但係遊戲目測都幾吸引的，以下係遊戲 Trailer：