【中毒性強】無限城玩法探索 RPG《東方 Project 不思議的幻想鄉 Reload》玩到上癮

 

對於《東方 Project》我了解並唔算深,淨係玩過佢少量彈幕遊戲,所以今次呢隻《東方 Project 不思議的幻想鄉 Reload》係我第一次接觸《東方》嘅 RPG 地城探索遊戲。

呢隻《東方 TODR》本身係 PC 遊戲,舊年於 PSV 上面推出合集,今年就落埋 PS4 以及 Switch。如果你本身係東方 Fans,相信一早就課左金架啦(笑)因為繁體中文版遊戲於 2018 年 6 月 29 日已經推出市面。

我手頭上嘅係 PS4 版,不過,我就比較建議未入手嘅朋友選擇 Switch 版~點解?而家慢慢講你知。

 

 

如果你問我呢個「唔係東方 Fans」嘅玩家「呢隻 Game 好無玩?」,我都會好爽快地答你「幾好玩」,因為呢個遊戲好中毒。

中毒,因為你會忍唔住狂衝城、狂升級!

玩家喺地城入面,打怪打得越多,就越升得高 Level;而身上裝備嘅武器、防具同飾物亦會隨之而 Upgrade。不過,假設你喺地城戰鬥中 Game Over,可以帶返據點繼承嘅,就只有裝備嘅 Level,以及身上持有嘅道具。角色嘅 Level 於離開地城後就會打回原形。

 

 

你唔好睇啲角色、畫面圓碌碌咁,就以為呢個 Game 一味賣萌,錯哂呀!好難玩架!一來每一層地城嘅敵人數量、位置、陷阱等,都係隨機的,玩家無得話「今次死喺度,下次小心啲」,No,隨住地城難度增加,你就只能夠靠技巧去通關了。

例如遇上上圖中嘅「百鬼夜行」,你試下貪刀吖,一定會死得好乾脆……

 

 

二來,大家千祈唔好好似我一開始咁傻,諗住「咁我帶多啲體力藥同埋食物出去打消耗戰囉!」,因為玩家隨身可抪帶物品數量有上限的,而且商店裡面可以販賣嘅藥品道具都係有限供應,就算你肯傾家盪產去買,Sorry,人地根本唔夠貨比你入倉……/w\

雖然去到後期,你會夠素材可以自己即場「融合」藥物道具,不過,你信我啦,與其靠外物,不如靠自己(握)呢一點,絕對係玩呢個遊戲嘅最好訣竅 LOL

【小竅門】

不過,你電腦惡之餘,人類都係好狡猾的(喂),大家如果打城中途死咗,唔緊要,即刻 Quit Game,重新進入遊戲的話,就會由你 Game Over 嗰關重新開始的!如果善用遊戲的 Auto Save 機能,就算頭先「意外死」,都仲有比你原地挑戰嘅機會(笑)

當然,如果真係打極都輸,或者真係乖乖地練勁把武器再黎挑戰啦。

 

 

接下黎就講返少少角色方面嘅要素!托遊戲的福,我而家終於認得哂《東方》嘅主要角色群(笑)遊戲中嘅故事其實分為幾個章節,每通一個角色章節,就會解鎖另一個新角色嘅段落(一開始係靈夢、之後就解鎖亞里莎,如此類推)

對於唔熟悉《東方》嘅玩家黎講,遊戲當中嘅世界觀或者角色性格背景都可以好快上手,所以就算係「非 Fans 玩家」如我都可以輕鬆入坑(入坑咋,唔係通關呀!)。

 

敵友角色出特技時都會解鎖 2D 彩圖一枚

 

睇完我上面嘅感想,大家明唔明點解我會比較建議大家用 Switch 玩呢(笑)?因為呢種需要大量時間投放嘅遊戲,用 PS4 玩你真係唔會夠時間升裝備!(不過PS4 限量版 Box Set 入面本畫冊真係好鬼靚,所以我依然無後悔擁有 PS4 版 /w\)

遊戲繁體中文版已經上市,最後送上官方宣傳影片:

 

神婆

神婆 非典型占卜師,唔神秘,無形象,除了鐘意聽客人講故事,夜間興趣係打機睇動漫同玩貓;日系遊戲及 JRPG 專攻! https://www.facebook.com/katechengyk

追蹤

Facebook 更多文章