大逃殺模式必勝?《The Culling 2》上市短短九日就正式收檔!

之前《PUBG》(PlayerUnknown’s Battlegrounds)總監 Brendan Greene 就曾經話過今年會係大逃殺元年,意思即係會有大量大逃殺類型遊戲推出,又或者會附加大逃殺模式,而呢樣野亦都真係應驗咗。但係咪只要有大逃殺就會得到玩家既青睞呢?似乎又唔係。

 

事源係由 Xaviant 開發既大逃殺作品《The Culling 2》(我諗無乜人識),呢隻遊戲主要係玩 50 人升級式大逃殺對戰,並且係 7 月 10 日已經分別於 PS4、Xbox One、 Steam 三個平台上架。就咁睇似乎應該唔錯,但係隻 Game 上市之後遊玩人數竟然突破新低點!

 

點解好地地一隻新 Game 會搞成咁?原因係大部份玩家都批評遊戲缺乏新意、系統優化差劣,加上遊玩玩家人數實在太少,根本連開局都有問題(仲得到 Steam 「極度負評》美譽)。而根據 Steam Charts 數據,係第二日最低線上人數得……2 個人。遊戲係咁受歡迎既情況下,開發商 Xaviant 就決定將《The Culling 2》下架,並且比已經購買遊戲既玩家申請退錢(都算係咁啦)。

 

《The Culling 2》正式上市短短九日就面臨下架命運,到底係咪大逃殺類型遊戲既警號?觀乎黎緊既射擊大作都只係附加一個大逃殺模式,而唔係將重心完全放晒係該模式度,似乎就係比較穩陣既做法。當遊戲市場太多同類型遊戲係咪好事,各廠商都需要深思。

五木

五木 動漫電玩宅,極愛金田一系列,擅長動作及策略遊戲

追蹤

更多文章