【遊戲簡評】扮《L4D》氹你入局 打異形 FPS 伏作《Earthfall》

雖然一直以黎都有唔少遊戲係以《L4D》(Left 4 Dead)做目標,亦有好多廠商係換湯不換藥,打住四人合作、共鬥打喪屍等元素做賣點,一直以黎都有唔少人中伏。最近就又有一隻類似《L4D》咁玩既遊戲出現,叫做《Earthfall》,不過質素就認真麻麻地啦。

 

呢隻叫《Earthfall》既遊戲係由小型遊戲製作團隊 Holospark 開發,主要玩法都係四人合作 FPS。故事就講地球比外星異形入侵,而玩家既目標就係要大家互相扶持逃出生天咁樣。比《L4D》進步既地方就係佢可以 Set 陷阱殺敵,而未講遊戲優劣之前不如睇下佢條宣傳片先丫!

 

睇完條片係咪有種「丫,睇落都唔錯,可以一戰既感覺」呢,放心,香港有幾間唔專業既媒體都係咁樣報導,然後你地咪中伏囉!

遊戲內可以 Set 陷阱,有圖中呢類閘,亦有自動機槍塔

 

FPS 遊戲我諗大家最著重一樣野,就係「射擊感」。而呢樣野係呢隻遊戲入面都算叫做有既,不過勁薄弱咁囉……計落應該仲薄過豬肉紙。《Earthfall》入唔面無論閣下用咩槍都好,打中敵人之後無明顯爆血效果、無明顯受傷動作,感覺尤如打紙板公仔,老實講以一隻 FPS 黎講真係唔合格。

而且遊戲內槍支種類數量非常少,槍支模組亦極有「膠味」,射擊音效直頭好似玩緊氣槍咁,真係算把啦……

隔住個 Mon 都聞到把槍陣膠味

 

遊戲畫面方面就不過不失,始終用 Unreal 4 製作,點都有返咁上下。不過光影特效就做得非常奇怪,黑位超黑光位超光,唔知想點。而火焰特效就非常地核突,似噴緊紅色煙多過似噴緊火。至於敵人呢,種類非常少,黎黎去去都係打同一款怪。精英怪數量仲極度稀少,會令你懷疑佢地係咪瀕臨絕種生物黎。

呢隻係精英怪黎,個賣相真係……

 

而怪物造型已經做得麻麻地,個人評價係既無 Heart 又唔恐怖,你話係旺角街邊見到果啲人扮既我都信。最離譜既係遊戲入面既任務提示都做得好唔清晰,好多時原來任務已經完成,可以去下一個地點都無人知道,經常性幾條友傻傻下咁企度清怪……

敵人既造型……其實佢係咪想慶祝聖誕節所以掛晒啲燈飾上身?

 

呢隻咁出色既遊戲唔寫太長啦,總括黎講《Earthfall》如果係免費 Game 就可以一戰既,你話要比錢買的話…..呢個世界係百貨應百客架嘛,係咪?

《Earthfall》已於 PS4 / Xbox One / Steam 推出。

滅盡殺手

滅盡殺手 重度魔物獵人中毒者,歷代遊玩時間破億分鐘!

追蹤

更多文章