【地獄儀式】啟蒙自《P.T.》及電影《死亡習作》PS4 求生驚慄遊戲《S.O.N》

 

《P.T.》呢個遊戲,風評雖好,不過要再玩到完全版應該都無咩可能架啦……今次同大家介紹一隻玩法相近嘅恐怖探索遊戲《S.O.N.》,由美國嘅獨立工作室 RedG Studios 開發,早前於網上發佈第一條 Trailer 之後已經引起大量關注,預計登錄 PS4 平台。

《S.O.N.》嘅劇本設喺美國南賓夕凡尼亞洲,一個名為「Clarencaster」嘅架空森林裡面。玩家嘅身份係Robert Alderson,一個中年失業嘅父親,你重視嘅兒子 Jay 去完「Clarencaster」就失左蹤,所以,為左搵返 Jay,你黎到呢片森林。

 

 

然而,「Clarencaster」並唔係普通嘅森林。直至 2018 年,已經有 648 人喺森林中失蹤,當中包括登山人士、警察以及搜救者。時至今日,當局亦只係搵返 22 具遺體,全部清一色係小朋友嘅死體。

遊戲名為《S.O.N.》並唔單止因為你要去搵失蹤左嘅仔咁簡單,同時亦都因為,呢個森林,同時被稱為「South Of Nowhere」(虛無之南);一旦進入森林南部,或者你就再出唔返黎。

而你並唔係第一個為左尋找失蹤孩子而黎到呢片森林嘅人,早喺 1996 年時,另一位父親 Dylan Shuss 同樣地為左尋找失蹤女兒 Tammy 而黎到呢度,佢仲將自己一路探索嘅過程,用手提攝錄機拍攝落黎。

 

 

或者,你可以直接睇呢條片:

 

 

森林中被黑膠袋包住嘅死體、疑似邪教儀式、血字、廢屋,仲有背後不斷響起嘅呢喃聲、窮追不捨嘅黑影……呢條 1996 年 2 月嘅片段,結果喺 3 個月後先被發現。然而,Dylan Shuss 同埋佢個女 Tammy,亦同樣地埋葬在森林嘅黑暗當中了。

睇到呢度,相信大家會明我點解話遊戲似乎深受《P.T.》以及 1999 年美國恐怖電影《死亡習作》影響!

《S.O.N.》係一隻第一視點探索求生遊戲,但係遊戲重點並唔係要你殺怪,反而係要你手無搏雞之力地面對眼前嘅黑暗。遊戲裡面嘅怪物,似乎同「地獄」及「惡魔」有好大關係,到底始作俑者係邊個?你個仔係咪凶多吉少?又或者咁講:你最後可以搵到幾多真相,又是否能夠全身而退呢?

遊戲剛剛公佈另一段新 Trailer,就展示左玩家黎到廢屋下面嘅洞穴,同樣地充滿住吊死嘅死體,亦見到更多實體化嘅惡魔形象。

 

遊戲另一個公開場景

 

遊戲當中用左好多古語言「Runes(盧恩字母)」,根據維基百科,「盧恩符文曾是古老歐洲民族如維京、日耳曼、塞爾特、和盎格魯薩克遜所廣泛使用的字母」。點解遊戲中要大量使用古語,目前仲係一個謎題,但係如果要清晰解說遊戲中所有隱藏訊息,玩家可能要上網搵定啲現代對照語言(笑)

《S.O.N.》美版預計 2018 年 10 月上市,亞洲版未知,最後送上最新 Trailer:

 

神婆

為咗兩隻貓嘅生活努力奮鬥,遊戲雜食向,全種類 RPG 專攻,重度聲優控。

追蹤

Facebook 更多文章