【Falcom 社長訪問】就算《閃軌》完左《軌跡》系列仲有好長嘅路！動畫化有可能嗎？

《閃之軌跡》1～3 嘅高清繁體中文版即將於今年起陸續於 PS4 上推出，至於玩開日文版嘅朋友，相同亦都對將於 9 月 27 日上架嘅《閃軌 4》結局篇充滿期待。編輯部好榮幸能夠參與 Falcom 社長兼遊戲製作人近藤季洋嘅訪問，同場仲有男主角黎恩嘅聲優內山昂輝添！到底佢地有咩消息帶比一班 Fans 呢？

（藍色為製作人近藤季洋，紅色為聲優內山昂輝）

Q：點解《閃3》中文版比日文版遲咁多推出嘅？

A：原因比較複雜，一來翻譯上面需要花點功夫（翻譯由 Sony Interactive Entertainment 負責），加上要配合日本方面嘅宣傳等等程序，所以推出日期先會有此安排。不過，我地都知道華語地區玩家等《閃3》等得好耐，所以要加快《閃4》中文版推出嘅時間，2019 年初大家就會玩到了！（編按：《閃4》日文版今年 9 月 27 日推出）

Q：《閃軌 4》入面出現返好多前作角色，佢地喺遊戲中佔嘅比重有幾多？又會為《閃》嘅角色們帶來咩衝擊？

A：首先我想指出，黎恩佢地眼前嘅危機，已經唔只是係帝國獨有嘅問題，而係關乎成個大陸。帝國軍事力量最強，當然佢地會全力抵抗，但係要根治問題，就需要其他勢力嘅協助；所以，無論《空軌》主角艾絲蒂爾＆約書亞）以及《碧軌》主角羅伊德，今集大家都會全力支援黎恩。

Q：《零軌》及《碧軌》有無移植 PS4 嘅打算？

A：目前沒有呢個打算，不過，我地都明白隨住遊戲平台嘅變更，好多玩家或者會想玩返一啲舊作，之前推出嘅《空軌 Revolution》就係一個例子。我地都會經常檢視返玩家有咩訴求，有可能嘅都想盡量加以實踐。

Q：黎到《閃4》，聲演黎恩嘅內山先生又對角色心境變化有咩想法呢？

A：《閃1～2》裡面我係一個學生，黎到《閃3》我就變成教官，而去到《閃4》……因為唔可以劇透，我只能夠話《閃4》嘅黎恩會係以一個全新面貌登場。

正因為角色嘅身份一直存有變化，所以我每一集開始進行錄音之前，都一定會同遊戲開發團隊再三確認了解，到底今次嘅黎恩喺故事入面，係一個咩野定位、咩野心態，然後我先會確定自己要如何演譯角色。

Q：內山先生自己會唔會期待《閃軌》將來會動畫化呢？

A：其實以往嘅《軌跡》系列都有推出過一啲動畫元素嘅作品，例如 OVA《英雄傳說空之軌跡 THE ANIMATION》咁樣。當然我決定唔到《閃軌》有無得動畫化啦（笑），不過，如果有機會嘅，我會好樂意再次參與演出架！惟一苦惱嘅係，其實《閃軌》嘅對白都幾難幾複雜，一諗起要再讀一次呢堆台詞，我真係要再加把勁啦（笑）

Q：內山先生喺《閃軌》中最難忘嘅畫面係？

A：作品入面有好多名場景，所以我都講唔出邊一幕最難忘；不過，以前我係學生，去到後期變成教官，呢一個變化係最有新鮮感的。

Q：《閃軌 4》係《閃軌》嘅最後一集，但係《軌跡》系列仲有幾多劇本未推出呢？

A：有關帝國嘅劇情，於今集《閃4》就會完結。不過，如果係講緊成個大陸上面嘅故事，《閃4》會同時掀起一啲新嘅謎團！《軌跡》第一部作品係 14 年前推出，而呢個故事我地由開發到而家，已經係第 16 年了，好開心今日可以親口同大家講大陸上面仲有一啲伏筆：《閃4》完左，但係呢個故事仲未完架！連同之前嘅《空》《碧》，而家大概講述左成個《軌跡》故事嘅 60％左右啦。

我想補充一點，雖然遊戲世界入面只係過左兩三年，但係現實已經過左五六年了，呢段時間入面，我嘅聲音都同一開始有少少變化，變得老成持重左；雖然呢一個變化剛好迎合左黎恩嘅變化，不過，有時我內心會覺得自己好似有少少取巧左呢（笑）

Q：早前近藤先生接受日本電擊訪問，提到 Falcom 開發遊戲方針會以故事創作為主，而唔會好似其他公司咁將資源大量投放喺 CG 畫面上面。請問呢一點都係公司未來方向嗎？

A：哈哈，咁又未至於咁極端，而家嘅遊戲畫面都係好重要的，而我地一向的確係以故事創作為重點。不過，之所以唔會大搞 CG，原因係因為我地想保有公司人手集中嘅作風，如果要搞靚 CG，可能就要由而家嘅 50 位人手，增加到 100 位以上人手了。

如果真係要講未來方針，我反而想提一提《伊蘇》。作為我地公司嘅另一大系列作品，《伊蘇》相比劇本更加重視遊戲性，所以我地黎緊反而係想專心改良佢嘅遊戲系統。當然，點樣令到遊戲更好玩，始終係我地一直思考嘅問題。

Q：最後想問內山先生，遊戲中你有好多約會場面，你自己最鍾意嘅又係同邊個約會呢？

A：嘩……呢層……（內山回頭望佈景板露出苦惱貌），而家我嘅身份係老師，而有好多角色係我學生，我好似唔方便答呢個問題添……（笑）

始終每個玩家有各自喜好與感受，《閃4》裡面嘅約會場景會同之前有少少唔同，請大家期待一下啦。