【遊戲感想】《說謊公主與盲眼王子》治癒繪本風解謎遊戲(洋蔥有)中文版都就黎出~

 

由「日本一」開發嘅繪本風格解謎遊戲《嘘つき姫と盲目王子(說謊公主與盲眼王子)》其實早於今年 5 月份時已推出市面,平台為 PS4 及 Switch;之所以拖到而家先寫感想文,係因為遊戲今個月會推出埋中文版,預計 8 月 23 日上架~

「日本一」一向頗擅長製作小品型遊戲,例如早前嘅《深夜迴》;不過今次嘅《說謊公主》之所以引起我嘅興趣,主要係因為日本嗰邊對遊戲好評不斷,官方甚至要響應網友聲音而延長個遊戲原畫展;咁到底呢個遊戲好無玩?

我諗,相比遊戲性,佢嘅故事比一切都吸引。唔係話遊戲唔好玩,遊戲係採用橫向關卡解謎玩法,有大部份謎題都要公主同王子二人合力去解決。

喺盡量唔劇透嘅情況之下,我只能夠講,真身為狼嘅公主,既需要保護人類王子,亦要指引睇唔到野嘅王子去幫手解謎;而謎題關卡雖然唔算困難,不過有時要玩重量、有時要玩拋物線,總會有地方要你用下腦的。

 

 

遊戲故事背景就可以略略同大家講下:女主角係一隻狼,佢唱歌好聽,引來人類國家的王子每夜傾聽,點知嚇親女主角,一出手就抓傷王子雙眼,令佢從前失明。女主角好悔疚,走去搵森林魔女將佢變成公主,去拯救王子;但係,魔女每做一樣野都會有代價……以上為官網都有公佈嘅資料,所以唔好話我劇透 w

 

狼化時可以打死魔物

?!

 

成個故事可以話係溫情中但又令人心痛,雖然遊戲點都係偏治癒系,不過,一日未玩到結局,劇情變化都頗令人緊張:到底王子會唔會發現身邊嘅公主就係當時整傷自己隻狼?當真相大白之時,王子又能否原諒對佢講大話嘅女主角?同埋,魔女呀魔女,叫得做魔女就真係唔方好野,所以去到結局時,我都對個結果唔係好驚訝(遠目)

放心啦,又唔會好虐嘅,雖然繪本十本有九本嘅背後含義都好黑,不過呢個遊戲嘅故事非常純淨(笑)

 

 

綜觀黎講,呢隻算係唔錯嘅小品,全遊戲以敍事詩形式,有旁白做故事導讀,想學基本日文嘅朋友可以考慮 LOL 不過,對於追求遊戲複雜性、或者遊戲深度嘅朋友,或者就會略嫌遊戲簡單了,反而唔係太 hard core 嘅玩家、或者女性玩家可能會感興趣一些:)

提多次:遊戲中文版 8 月 23 日上市呀~

 

神婆

神婆 非典型占卜師,唔神秘,無形象,除了鐘意聽客人講故事,夜間興趣係打機睇動漫同玩貓;日系遊戲及 JRPG 專攻! https://www.facebook.com/katechengyk

追蹤

Facebook 更多文章