《Anthem》怪物類似《MHW》生態 擊倒可獲豐富戰利品

由 BioWare 製作既多人連線射擊遊戲《Anthem》隨住越黎越接近發售日,公開既資料亦都越黎越多,而且亦都無令人失望。最近《Anthem》主要製作人 Ben Irving 就係一個專訪入面透露更多既資訊,其中最吸引既就係遊戲內既怪物生態,似乎想進一步話比大家聽,《Anthem》唔會係另一隻《Destiny》。

 

係《Anthem》既世界裡面,玩家將會黎到一個非常巨型、風光秀麗而且仲伴隨住危險既開放世界。呢度指既危險當然係黎自遊戲內既野生怪物,而且根據訪問既內容,係《Anthem》內既怪物並唔係隨機生成,而係有系統性地生成的。而怪物之間不同種群、不同種類亦會有唔同既關係。簡單講就係如果系統生成咗二隻互相敵對既生物群體,而佢地處於同一區域的話,二個群體就會互相戰鬥,亦即係好似《Monster Hunter World》咁,怪物之間係有自己既生態。

 

當然遊戲內呢啲野生怪群體係可以攻略的,只要擊敗佢地就可以得到相應既戰利品,當中包括最基本既彈藥、回復藥,亦都有裝備等物品,而有部份裝備玩家要返基地鑑定後先用得。換句話即係玩家將會要打野生怪刷裝,而作為一隻 Online Game 亦都好適合呢種做法,剩底既就係野生怪群既強度,如果太廢就真係刷都無癮……。

 

另外《Anthem》監製 Mark Darrah 早前亦都透露過少量消息,例如係遊戲並無規定玩家必需承接任務先可以出擊,玩家隨時探索地圖任何地方,完全不受限制,但係如果係任務途中換裝備的話就會自動退出任務。至於遊戲核心既機甲將會係遊戲過程中得到越黎越多既個人化選項,例如係噴成任意既顏色等。不過機甲係唔會另設技能樹(但係角色本身有等級的),要強化裝甲只能透過換取部件,要得到高級既部件除咗參與活動之外,打野生怪物亦都可以得到。

 

《Anthem》將於 2019 年 2 月 22 日發售,對應平台為 PS4 / Xbox One / PC。

五木

五木 動漫電玩宅,極愛金田一系列,擅長動作及策略遊戲

追蹤

更多文章