【遊戲感想】M屬性頂級無間自虐動作遊戲 Dead Cells

家用機同手提機市場對全新嘅高質素橫向動作遊戲都餓左好一段時間,如果唔係點會《Bloodstained: Ritual of the Night》延期都要出隻《Bloodstained: Curse of the Moon》去比玩家們止下痕。但今次想講大家係餓左好耐的話,有好野可以開餐,並且大家一定放心享用兼食得飽飽!

早前同大家介過嘅呢隻《Dead Cells》,講就話隻 Game 係銀河城 (Metroidvania game) 類型,實質上仲要加入左《Dark Souls》嘅故事表述同升級系統。死左就重頭由遊戲起始位置重新開始,而且跌晒啲升技或者武裝解鎖用嘅「細胞」、金錢就會歸保險線(冇保底就直接歸零)、你辛辛苦苦執到/買到/打到嘅裝備全部都會冇晒,某程度上等於重新開始冇分別。

 

雖則話一死就重新開始過咁,但係遊戲中執到或者打完怪之後得到嘅「細胞」,只要一過版就強制要你用晒去,相等於強迫你強化角色,而且當你玩多幾次習慣左操控系統之後,你就算普通嘅起始裝備都夠無損傷過到頭兩版。記住呢個遊戲嘅武器同道具配搭多到數唔晒,每把武器仲可以附帶多過一種嘅效果,同一把武器附帶效果改變亦會完全改變使用方法。而且仲要配合埋自身三個素質點(殘酷戰術生存)以及最多只可以裝備三個嘅輔助技能(變異),所以每個玩家嘅武裝同技能都未必完全一樣,打法就更加多變化。

 

我想儲多啲先升啫,犯法咩?!

 

初初起手大家都會比較怕無血而選擇一啲穩陣回血嘅技能或者配點方式去玩(生存),但死多幾次你會發現推血同推殺怪回血係冇大幫助,而且唔會打到補血道具嘅時候,就自然地改變以武器主導(殘酷)或者道具主導(戰術)去繼續遊戲,咁最緊要其實係搵自己最啱手同最有效果嘅武器同道具啦。不過搵啱就唔好再解鎖更多嘅武裝,事關遊戲中武裝商店或者流程中打到嘅武裝就係係解鎖左啲乜就隨機出比你,你越解得多唔啱用嘅裝備,相對你啱手嘅裝出現機率就越少,所以唔好亂洗錢啊!

 

爆第一機啲武裝都只係儲得三份一

 

成個遊戲總版圖數量雖然唔過 20 個,但每次死完要入關之後成個地圖會完全改變,連接下一版嘅路徑亦有多過一個選擇。部份嘅版圖入面仲會收埋一啲隱藏道具嘅取得條件,唔好彩嘅話你可能搵一世都未必搵到,好彩的話跳下跳下就會撞到出嚟。而遊戲嘅主要故事係散落於遊戲世界當中,雖要玩家自行重組整個故事,所以當你玩多幾次,喺唔同嘅地區探索多啲就會了解事件嘅起源同經過。

 

死完一次,成個世界唔同晒

牆角收埋件蛋糕!

打左兩個Boss之後就會開每日挑戰,贏到又係會有獎勵

 

遊戲中除左探索呢個玩法,仲可以以 Quick Run 方式去過版。例如由第一版圖以兩分鐘內到達第二版圖嘅限時門,就可以獲得豐富獎賞,而其中某啲武器係需要以呢個獎勵方式先可以得到,所以死多幾次就要學識走得快、打得快。

 

開得到鎖就有得升點,仲有十幾個細胞等你攞!你仲唔 Quick Run!

 

雖然完成爆第一次機之後,劇情嘅迷團都好似仲未解開晒就直接重新再開始。玩家可以同一難度去繼續儲武裝同技能等等,又或者選擇用爆機之後嘅 Boss Cells 去挑戰下一個難度級別。難度增加之後唔只怪物嘅攻擊力同血量增加,版圖中怪物種類亦同樣會增加,而且怪物嘅攻擊反應亦會比上一個難度更快。相對地玩家得到嘅武裝、細胞數量都會隨難度而有所增長。

 

 

我唔敢講自己係動作遊戲強手,但呢隻《Dead Cells》係可以強迫玩家重複訓練某一啲基本動作,喺死亡中不斷成長,慢慢由手殘打到比大家覺得有丁點華麗。遊戲整體亦係用好多動作遊戲嘅基本要素去不配搭出新鮮感,而且你玩 NS 版本,係日本 e-shop 買都只係2,480円(約港幣 $173),絕對係庶渣價錢燒鵝脾味道,就算你爆第一次機你都仲有大把野未儲完或者會想繼續挑戰更高嘅難度。然而如果《Bloodstained: Ritual of the Night》最終今年出唔到,《Dead Cells》絕對會係今年橫向動作遊戲嘅王者。

 

我已經再記唔起今次係我第幾次殺你

 

阿九

阿九 打機 - 識少少;玩具 - 識少少;睇戲 - 識少少;動漫 - 識少少..... 買膠、派膠、分享膠!Only The Best Is Good Enough! Lego Enthusiast https://goo.gl/HRnxDW

追蹤

更多文章