雖然我都好鍾意玩《Battlefield》呢類戰爭遊戲，但係戰爭既本質係沉重而殘酷呢點應該無乜人反對，當中又以二戰最為人所熟悉。係二戰期間最慘烈既國波蘭就有間遊戲廠商 Juggler Games 製作一隻極有創意二戰背景既遊戲《My Memory of Us》，除咗提醒大家呢段沉痛既歷史外，亦可以由另一角度去體驗當中既故事。

《My Memory of Us》屬橫向卷軸動作冒險，遊戲以卡通風格表現，故事背景為二戰時期被納粹德國統治既波蘭。遊戲中既納粹士兵都變為恐怖既機械人，遍佈係城市每個角落監視市民。遊戲主要以黑白二色畫面表達反戰思想，當中只有血液、衣服、愛心以及其他少量元素會出現紅色。如果有睇過「舒特拉的名單」呢套電影的話，就類似戲中紅衫小女孩咁樣。

玩家將會操控二位小朋友，分別為一男一女，男仔擅於躲藏，而女仔則擅於跑步，玩家必須透過互相合作，先可以保住自己既性命及拯救有需要既人。而玩家可以個別操縱二位又或者係一齊行動，當然隨住故事發展，有可能會有其中一位比人捉咗，然後就需要運用各自己既能力解謎，去捱過呢段黑暗既時光。

另外《My Memory of Us》仲有一樣好值得注意既，就係旁白配音將由著名影星 Patrick Stewart 擔任，亦即係 X-Men 入面既 Professor X，由佢黎聲演就更有長者向小朋友講故事既味道，令人加倍期待。

《My Memory of Us》將會在 10 月 9 日推出，對應平台為 PS4 / Xbox One / PC Steam。