近來 LEGO 嘅創作界有好多嘅風風雨雨，引起左大家思考一個問題「究竟我地喺創作嘅時候可唔可以用到官方產品以外嘅元素呢？」

先表明一點，你就算拎其他品牌或者大家認知嘅翻版件去砌作品，只會係你個人選擇，唔會因為咁要拉要鎖要有法律責任，只係作品品質上或道德品格上嘅問題就閣下自理。都係嗰句，玩玩具啫，犯法咩！

不過如果你係香港四大 LEGO 官方認可用戶組職 Recognized LEGO User Groups (RLUGs)嘅核心成員，喺創作嘅時候好多機會會代表團隊去參展或者發報作品，咁你就要小心用件。

香港四大 RLUGs ：人仔倉 Minifigs.net LEGO User Group、香港樂高迷用戶組 – Hong Kong LEGO Users Group (HKLUG)、Legend Bricks Hong Kong LEGO Creators Club、Hong Kong Brick Rail 樂驛地

其實不論香港定世界各地嘅RLUG，除左有官方提供嘅一啲褔利(咩福利就遲啲同大家介紹)之外，有權利就有義務，寫得出嚟嘅守則就必需遵守。尤其係展覽或者一啲活動上展示嘅作品就更加要留意，因為嚴重起上嚟一件作品出事就連累到官方認可都隨時冇埋。

不過大家都知道有啲未必係侵權嘅產品，例如第三方印刷、官方組件加燈之類，咁又點樣去計呢？

其實喺世界各地好多大型嘅創作交流活動上，製作第三方產品嘅公司都會有一啲推廣或者銷售嘅攤位，例如用官方組件再印刷嘅 Minifigures、自己開模去生產嘅組件或者 Minifigure 配件，不過留意喺呢啲活動上都係以 Bricks 或者 Blocks 去代表，而非講到明係 LEGO 活動，呢個灰色地帶係比多少少原創第三方產品一啲生存空間。

21310 Old Fishing Store原創者都係用香港第三方燈件品牌 Brick Light嘅產品去美化自己嘅創作，仲拎埋去簽名會添

開頭都講過大家都係玩玩具啫，犯法咩！的確未必會犯法，但道德層面上未必會受到所有人專重，舉個例子比大家。好多創作人都會將自己嘅作品設計放上一啲銷售平台度賣，咁當然係受權而且係自己原創作品。雖然官方與否都有一啲比大家方便創作嘅電腦軟件或者網站(LEGO Digital Designer、Stud.io、Mecabricks Workshop)，不過都見到不少創作者會用非官方產品去砌返實物版本出嚟。

Mecabricks Workshop直頭係網頁版本，唔洗下載唔洗裝架

有啲玩家會認為創作嘅價值大於使用乜野材料，佢地唔會介意作者係唔係用官方生產嘅組件；相反對知識產權捉得比較嚴緊嘅玩家，溫和啲嘅情況可能會欣賞你嘅創作不過都希望作者用返官方產品，火爆啲嘅就可能會覺得對品牌本身都唔尊重又點會接受你嘅作品。

喺唔少嘅平台都會見到類似嘅情況

而且近年 3D 打印開始普及嘅情況下，部份玩家亦會喺自己作品加入一啲 3D 打印所製作嘅組件，如果你係參賽或者官方展覽就當然冇咩可能啦。但作為非官方嘅交流用，大家又會唔會抗拒呢？

增強創意定係摧毀原意？

其實「只可用官方件與否」呢個話題應該夠寫一份大學論文或者正反相方討論三日三夜，不過我就只講到呢度為止！喺唔同場合情況，大家對呢個問題嘅取態都可以有所分別。但如果大家係以 LEGO 呢個品牌出發，係你成長或者創作伙伴的話，可以花少少時間去睇返 LEGO 呢個品牌佢所定下嘅本義同對社會嘅責任。雖然有人質疑呢個品牌依家仲做唔做到佢所定下嘅框架，但最終本義都只係想大家玩得好、玩得開心。

其他問題，重要咩？