係外國極受期待既《Metro Exodus》，一直都以超靚畫質掛帥，但係真正表現如何一直都唔係太多片段睇到。不過日前係 Gamescon 入面，外媒 IGN 就為大家帶黎一段使用 Xbox One X，主打潛行戰鬥既實機遊玩演示，而遊戲既表現真係無令人失望，真正靚絕全場！

《Metro Exodus》由烏克蘭遊戲廠商 4A Games製作，採用開放式世界。玩家將扮演系列主角 Artyom，佢將會離開前作既地鐵隧道，並前往俄羅斯大陸尋找新的生存點。而係今次既實機演示片段，我地見到遊戲潛行方式都係見慣見熟果類野，大家應該唔會陌生。當然由於《Metro Exodus》係一隻生存遊戲，彈藥就自然唔會太多，所以潛行暗殺除咗係必需既手段之外，用弓箭殺敵之後，過去回收返支箭亦都非常重要。

當然除咗基本既敵人之外，係野外地區仲會有各種受輻射影響變異既動物，大家都要小心應付。係場景方面，根據之前既資料，係今集作品大家將會體驗到四季變化，而今次影片內展示既就係俄羅斯秋季場景。同時遊戲內會有日夜替換系統，而且日間同夜間敵人既行為模式會有所不同，盡量觀察清楚先行動。

遊戲影片仲展示埋改裝改裝槍械界面，槍支種類繁多，而且畫質極華麗，槍械上既紋理材質極為細緻，希望到出街時唔好貨不對辦……。

《Metro Exodus》將於 2019 年 2 月 23 號推出，對應平台為 PS4 / Xbox One / PC。