雖然呢幾年格鬥大廠 SNK 出埋晒啲 Game 質素都唔係太好，但係爛船始終都仲有三分釘，佢話出新作就點都值得期待既。就係啱啱 SNK 既日本官網突然出現咗一個倒數計時器，而係呢頁除咗計時器之外就只有一句說話「A New Dawn Rises」，似乎意味住有一隻勁作誕生！
根據頁面上既時間，倒數完結時間大約就係日本時間 2018 年 9 月 10 日 19 時，而呢個時間臨近 TGS 2018，各廠商不嬲都會有啲搞作，當中 PlayStation 就會係 9 月 10 日 18:30 進行 Sony PlayStation Lineup Tour 展前發布會，按慣例佢地會係會上展示新一輪登陸係 PlayStation 上既遊戲，算係晒冷行動。而呢場發布會根據以往慣例大約為時一小時，預計時長1小時。而巧合既地方就係發布會開始半小時之後，就係 SNK官網倒數計時結束，咁計落應該新作會係 PlayStation 發布會上正式發表。
如果大家有印象的話，《KOF XIV》就係於三年前既既 TGS PlayStation 展前發布會上正式公布，睇個勢新作好有可能就係《KOF XV》，不過前車可鑑，記得執好晒啲樣先出街阿……
VJGamer總編，細細個已經蒲機舖，機齡甚深，熱愛電玩文化。