今個月係香港 PSN 免費下載既《Destiny 2》，係今日迎黎新 DLC「Forsaken」（遺落之族），而今次更新將會帶比大家一個新模式「Gambit Mode」。係呢個新模式玩家將會同時體驗到 PVE 同 PVP 二種截然不同既玩法，更有類似「害人塔防」既機制，詳情立為大家介紹下！
新模式「Gambit Mode」玩家會分成二隊，每隊各四人，各自係自己陣營所屬地圖戰鬥。係呢個模式下主要都係 PVE 打怪，係戰鬥中玩家只要擊倒敵人就會有機會出現白色三角型既碎片，玩家就需要收集並放入位於地圖中央既碎片儲存器，當碎片總數達 75 個之後，將會出現 Boss，邊一隊隊伍先擊敗 Boss 就會獲得勝利。
二隊各有四名玩話，各自係自己陣地戰鬥
最終目標係擊敗佢
呢個模式特別之處在於當玩家每次放 5 個、10 個、15 個碎片入儲存器時，對面陣營就會因應你所放入既碎片數量召喚破壞者，而且只要破壞者存在，碎片儲存器就會消失，直到破壞者死亡先會再次出現。所以隊友之間既合作同溝通就變得好重要，例如係咩時機由咩人去放碎片，陷害對面，但係呢個模式遠遠唔只咁簡單。
首先係「Gambit Mode」下，死亡係會失去該玩家所有未放入儲存器既碎片，但係如果驚死的話，每儲夠 5 個碎片就放入去又會變得浪費，因為 5 個碎片既破壞者實在太廢……所以就咁睇似乎係由最強既玩家拎晒所有碎片係最穩陣，但係其實又唔一定，因為仲有 PVP「侵入系統」果 Part 未講。
雙方都睇到對面手持及已儲存碎片數量（白色為未儲存碎片）
係呢個模式下「侵入系統」係當儲存既碎片去到 25 個時，係地圖中間就會開啟一道可以傳送去敵方陣營既傳送門，呢度傳送門將容許一名玩家使用並係對方陣營有 30 秒活動時間，但係上面所提到既死亡懲罰係依然存在的，所以如果係敵方陣營殺死手持大量碎片既玩家將會令對方陷入困境。就咁睇就好似防不勝防，但係有人侵入時系統係會通知你的，所以當系統有提示時大家咒要決定集體迎擊定係拿拿聲交晒啲碎片先。
夠 25 粒就可以侵入敵方陣地
因為得 30 秒活動時間，超必 / 追尾火箭炮應該係最好選擇
當碎片去到 75 個時，將會召喚出最後 Boss，但係呢個時候仲有翻盤既機會，因為呢個時候敵方隊伍仍然可以侵入。係呢個時候如果侵入者成功擊殺己方玩家，Boss 血量就會回復，所以如果打 Boss 轟晒啲超必就真係瀨野……
《Destiny 2》DLC「Forsaken」（遺落之族）今日正式推出，售價 HK$313.00，需注意必需購買《Destiny 2》資料片I與II。
VJGamer總編，細細個已經蒲機舖，機齡甚深，熱愛電玩文化。