【讀者投稿】Octopath Traveler – 置玩家於不顧?!

文長,涉及劇透,總結在最尾,想睇評分可直接跳到最後。

我相信有心去搵Octopath Traveler 來玩既人都離唔開日式RPG 既死忠,同埋一班對於RPG 整體來講有愛既人,當然亦有人比佢今次用2D+3D 畫風吸引左去來玩。

其實成個遊戲玩落係幾好玩,冇乜問題…………咦,咁咪即係講完?

錯喇!當你比有趣既戰鬥搞到悶,光影角色既渲染已經去到盡頭既時候,你就會突然驚覺︰媽!好伏呀!

注︰以下評論角度來自相同時期,同等價錢既其他RPG 以及JRPG 作對比,主要以比較形式講出遊戲優劣。

以下係Octopath Traveler 既優點及缺點︰

Sorry, 冇優點

講真,我玩左60個鐘,雖然唔係做哂所有野但都叫勉強爆左機,寫評論既時候想話搵個優點但都真係冇。畫面來講雖然3D + Pixel Art 係有驚喜,但佢既Pixel Art 唔可以話係靚,如果唔係就會對市面上千千萬萬隻Pixel Art 真係靚既Indie 作出侮辱。

戰鬥方面其實都係玩Break 系統既回合制遊戲,P5 仲要加埋捉寵同合成要素,比Octopath 有深度有挑戰性千百倍。

音樂方面平淡得來有少少驚喜,但即使單純從質量方面講,Xenoblade 2 可以話係贏幾十條街。

故事上,相對於坊間所言8 個故事並無交集,其實並唔係咁。因為九成九人其實玩完都唔會知隻Game 究竟講左乜,呢個我會用另一篇文章再交代。實際上,雖然都係果D 老套拯救世界野但係其實佢係好連貫同一體化。但都係…….老套囉……….

以上講完,其實大家就好容易明白呢隻Game 根本無任何個人既可取之處,買親既都係睇中個畫面甚至係老派回合制戰鬥而上釣既人(包括我),相反地,呢隻Game 既缺點就真係數都數唔哂。

置玩家生活水平於不顧!

之前係Far Cry 5 既評論入面都講過,遊戲既系統設計除左UI, UX 之外,仲要從整個遊戲流程上照顧玩家既生活水平。製作者應該永遠希望玩家開GAME 既時間盡量都係用來享受遊戲,而唔係同你個遊戲系統搏鬥。

好明顯,Octopath 既製作者從來冇咁諗過。

呢隻Game 既UI 係一篤屎!仲要係一篤太多纖維而拿埋一舊既屎!求其攞武器果欄來講,一入到去究竟佢係跟咩排?跟種類排?咁點解D 種類既次序係要呢個次序?點解我冇得自己揀?我果把野我記得個名,我想跟字母排喎!或者我想要把最高攻既弓,唔係魔攻係物攻呀!點解冇得Filter 弓然後跟物攻排架!

我啱啱開左個箱有把野,仆街手快得滯撳走左添,我頭先執到把咩呢?我連個分類Icon 都未睇到呀!喂,點解冇得用取得順序排架!你個腦裝屎架!

點解兩把野永遠冇得對比?唔係著上身對比呀!點解個物品欄除左個名之後乜鬼都冇架!價錢呢?(要等賣果陣先有),數值呢?(要Highlight 緊先有)

跟住仲有一大堆我都唔知點講好,補血藥即係回幾多血?加攻技即係加幾多攻?Heavy Damage 即係有幾多Damage? Heal More 既係補多幾多?個傷害公式,裝備同埋技能既效果到底係點樣互為影響?究竟佢只係冇寫,定特登唔想比我地知?如果係特登既,又點解要咁樣整蠱D 玩家呢?我真係睇唔透

跟住就到戰鬥,SE 呢旗下呢間廠都唔係JRPG 新手,至少Bravely 系列係做得唔錯,想當日Bravely Default 既年度版仲可以比大家用四倍速飛戰鬥添。咁點解Octopath Traveler 冇呀?你技能又唔係話多款過人,戰鬥又重複,仲成日唔比人逃走,好啦咁打啦,嘩果招咁既死人魔法同劍技我睇左千幾二千次喇!尤其是係普通敵人既turn 來來去去都係果套動畫不如算啦!我拿拿聲下一個turn 我用魔法炸死佢繼續行啦!

製作水平極其低下

Octopath Traveler 既建議零售價係7,344円,同Xenoblade 2, P5 差唔得幾多。作為一隻2018 年推出既遊戲,我要求返以今時今日既接近500蚊既遊戲製作水平,應該唔過份吧?係呢個準則下,Octopath Traveler 就唔單止係屎,仲要係食左兩舊屎!

畫面因為佢行復古風既關係,先唔作評論。

音樂方面算交到功課啦,但數量咁多既OST,玩起上來聽到既就只有不斷重複,呢個就係安排上出左問題。

呢個遊戲既死症係冇配音。當你滿心歡喜睇住個CV list 既時候,入場開頭第一句,你就發現根本就冇配音…….因為遊戲只有某個部份佢覺得係戲肉既地方先至會配音,其他時間佢只係表達個意思就帶過,即係「呀!」「哦….」「呃…..」之類。

跟住我望住隔離Xenoblade 2 日英全配音,仲要係你帶唔同既神劍出去再配搭其他人既神劍會講既野都唔同都配埋音……..跟住我求其開隻免費課金手機遊戲,所有劇情都全部有配音,喂我冇比錢架!跟住我再去steam 買隻5蚊港幣既舊indie rpg,入面竟然係全配音架!我上網求其搵隻Patreon Support 既免費Indie game, 全配音。屌,我免費下載個Skryim mod 返來玩有成幾十個鐘劇情,成百個NPC,都係全配音呀!~~~~~~~~

然後你望住Octopath Traveler 價錢牌,香港平D 都賣緊400蚊,佢夠膽死主線都同我唔配足!呢個世界公平咩?呢個世界公平咩!?少一分配音,就少一份投入,點解最應該要有既野佢都會做唔足?

十幾年前既JRPG,講野既時候都會加埋個CG 上面當人物表情啦係咪?就算係之前既Bravely Default,講親野D 角色都會全面大頭,起碼有個表情動作睇下先。

Octopath 係全部欠奉,你永遠都只係得果個Pixel Art 既人仔係度做果幾個廖廖可數既動作,你話佢側邊果度畫兩個主角係度,都係做果幾個廖廖可數既表情,其實我都BUY,起碼有畫。打BOSS 唔要求你做咩3D 過場動畫,2D 手繪我都驚你做唔來,求其畫幅畫比我見下個BOSS 咩樣都好丫!而家畫都唔畫,成隻Game 能夠睇得到主角身影既CG 一隻手數得哂,我D 錢究竟係比左落乜野度!

(暫時我淨係記得聽故事同埋完故事兩個地方有主角既樣睇)

話明係RPG,當然就唔少得裝備同寶物。例如你每次打低一個BOSS,佢地都會跌一件佢地既專用裝備比你,係幾有紀念價值既……如果我睇得到既話

3D 既打寶遊戲例如The Divison, Destiny 咁,都會比個模式大家仔細欣賞自己打返來既超型裝備。就算係2D 既Diablo 之類,都有張圖,就算係手機Game,都有個爛鬼Icon。唉唔洗嘞真係,我份人要求真係好低,你老尾寫段字同我介紹下呢把武器有咩咁巴閉都得掛!

(點止有介紹,直頭有段故添呀!)

我已經唔洗你整好靚既圖(其實圖唔係話咁難畫啫,Game 廠喎,專業架喎),你寫段字都得掛!就算係RPG Maker,個物品建立果欄,都有地方比你填物品介紹啦!因為佢地都知Indie game 既作者唔一定可能樣樣野都畫到圖,寫個字可能係作者同玩家最簡單既溝通媒介。

冇呀!

Squre Enix 大巴大巴咁煎落比左錢既客戶臉上。「你地只係一班睇到像素風就狗衝既ON9 傻仔,我根本就冇諗過要比你地享受遊戲,字我都唔撚會浪費時間寫比你呀!」

講起文字,我相信歐美RPG 既玩家係呢一方面感受會比較深。The Elder Scrolls 入面既書籍,Bioware 遊戲入面既codex,都係我地係遊戲以外,接觸呢個世界觀既另一種方法。係Octopath Traveler 入面,尤其是Cyrus 既章節中,玩家其實搵到既書不少,但係冇一本係可以睇既…….但果D 分明就係遊戲入面既故事關鍵,例如Trial of Twelve VIII,或者係釋本既From the Far Reaches of Hell等等…….

(譯本既From the Far Reaches of Hell….. 就淨係咁,冇得睇既)

而家遊戲入面真正有文字資訊既就只有去問人果陣有少少字,但就算睇完都唔會對個世界觀認識深左,極其量係幫你解個支線咁。大家認真要知呢個世界發生緊乜事,最後都係要睇攻略。

當然去到最後,發咁多牢騷都只因為佢既定價太貴。呢個世界從來冇話過製作水平唔可以低,不過你售價要跟住低咁解啫。以Octopath 呢個製作水平,如果一開始已經係賣250蚊以內,其實真係冇問題,你最多只可以話佢係冇乜特別既小品,但因為價錢唔高,所以少D 配音同少D 圖係在所難免。即使係咁,Octopath Traveler 無論主觀定客觀上來講,缺少咁多現代RPG 應有既要素,呀唔係,係對比以往既JRPG 都仲要略為遜色既情況下,就算幾平,都唔會亦唔應該獲得太高既評價。

總結︰做人最緊要腳踏實地

遊戲基礎分︰70

除左個音樂,最多當埋你畫面,係有用過少少心之外,遊戲既其他方面唔係平平無奇就直頭係屎來!你都睇得出製作者冇當過你係客戶,甚至可能冇當過你係人!咁你真係唔需要比面佢。

+音樂係啱feel 同埋係好聽既

+畫面係成個遊戲最令人關注同最有Gimmick 既地方

-真係冇人想比你個UI 阻住佢玩遊戲架OK?

-製作水平直逼Indies

最終評分︰65

近年來SE 既JRPG 真係毫無起色,本來都仲諗住Octopath Traveler 會好少少,點知都係咁,下一隻好D 得唔得呀!

Peter The Gamer

Peter The Gamer 人生如遊戲,我就係PETER,玩既係人生,唔會有個更好既名。 有時寫下評論,多數介紹下GAME。分享、批判遊戲。

追蹤

Facebook 更多文章