隨住「東京遊戲展 2018」舉行嘅日子越黎越近，唔同嘅日系遊戲消息呢排真係接續不斷！呢隻由 Altus 開發、一半單位黎自《Persona》系列嘅《Catherine Fullbody》亦終於決定要於 2019 年 2 月 14 日推出！佢嘅第一集《Catherine》已經講緊係 2011 年嘅事，當時對應平台為 PS3 以及 XBox 360，作為 Altus 旗下「成人向」做主題嘅遊戲，唔知在座有幾多朋友當年玩過？
上集故事大綱大概為：男主角 Vincent 32 歲，交往多年嘅同齡女朋友 Katherine 逼婚，Vincent 有少少吊兒郎當所以好淆底，點知遇上金髮小惡魔 Catherine 係咁想誘佢出軌，當日開始 Vincent 就開始陷入惡夢嘅迷宮當中。
遊戲玩法分為「現實世界」以及「惡夢之塔」兩個部份，根據上集，「惡夢」係惡魔為左懲罰不忠男子而製做出黎嘅設定，不過去到今集，除左正印 Katherine 同埋惡魔 Catherine，新角色居然係一個疑似偽娘嘅 Catherine！聽落覺得好痴線，但係同時好刺激（喂）唔知衰佬 Vincent 今次又會點樣比人玩餐飽？
系統方面，今集繼續係玩爬塔 Play，不過難度目前唔知會唔會比上集再增加一啲？更多遊戲消息將會於 TGS 開始之後再公佈，到時再為大家跟進。
新 Catherine 由遊戲公佈以來一直都好令玩家好奇，因為官方話佢「衣服下面收埋左一啲野」，聽到咁，我當時嘅第一反應，同你叫我去泰國睇靚女嘅心情係一樣，都係縮一縮！所以我係真心佩服遊戲班底，居然可以寫出一個咁像真（？）咁貼近現代人生活（？？）嘅劇本出黎。
官方揀情人節黎出呢隻多角關係 Game 都真係好搞鬼……是祝福玩家們有個甜蜜情人節嗎（笑）？最後送上遊戲 Trailer：
遊戲雜食向，FPS 苦手，全種類 RPG 專攻，重度聲優控。使用機種：Xbox Series X｜PS5｜Nintendo Switch｜Steam Deck。