【最終回】假中仲有假?!原作挑機「你諗到點做話我知!」

前日已經由製作人 Henry Pinto 口中得知冇授權過任何人或廠商去生產佢嘅 LEGO Gundam,而大家亦見得到有人於網開訂呢隻所謂嘅”高達”。(相關文章傳送門)

我地特登以買家身份走訪過相關有開訂嘅舖頭,發現所謂嘅產品資料都只係網上圖片。當中有店舖講到話有製作書嘅資料,對方都只係提供網上由原作 Henry Pinto 所影嘅相片及”疑似L牌包裝圖“去作為說服我地落訂嘅理據,但以「商業秘密」為理由去拒絕透露製作書,而我地亦表明只需要喺對方手上資料望製作書當中一格去求證真偽而亦遭推搪。

而且問及當中其實係邊個品牌所出品,對方嘅答案竟然係「“L牌”嘅,但如果你要”S牌”的話咪比返”S牌”你囉!總之唔係啲雜嘜啦!」及後另一男子到場表示「依家優惠價得返兩個名額,要訂就襯快啦!」我地以能否出貨為理由想得知相關到貨期及無發出貨結果如何,多番遊說之下對方講到「十月尾出,十一月都冇咪退訂比你囉」「如果出唔到貨咪退返錢比你囉!啦,你要嘅我喺張單度寫低囉」「買野冇百份百保障嘅,睇你去唔去搏、去唔去投資囉,大家講個信字啫!」而最終對方以我地咁擔心去要求「你唔好訂啦,你咁驚咪等現貨囉!

除左原作 Henry Pinto 所影嘅相片,”L牌”網站冇出現過嗰張”疑似L牌包裝圖

而同時我地亦以香港買家身份去查詢過 “L牌”嘅聯絡人,問到現有喺網上或開訂店舖所得知嘅資訊下係咪都係嚟自”L牌”,對方表示”L牌”的確正在製作,但除左”L牌”嘅產品號碼之外,價格出貨日期重量甚至產品名稱等等都有所出入。咁究竟依家所開訂舖頭最終賣嘅會係乜?咁大家可能不幸上有船嘅就真係得個「信」字啦!

而原作者 Henry Pinto 亦向我地透露佢所創作嘅 LEGO Gundam 從來都無製作書,所有嘅步驟、用件都只有得佢一個人知,模仿到嘅都只係靠佢早前貼過喺 Facebook 或 Instagram 嘅相片,不過當中有好多秘密結構根本就冇公開過!當然如果任何廠商將佢嘅作品變成產品嘅話,Henry都希望 Bandai 公司會出手提控,將呢啲侵權嘅商家繩之於法。剛剛亦喺佢嘅 InstagramFacebook 向”L牌”宣示自己嘅作品根本無辦法完全模仿。

Henry Pinto「如果你諗到點做話我知,Good Luck “L牌”」

事件去到呢度就算最終有咩產品出到嚟,對尊重知識產權嘅玩家都只係新聞一則。但同時定義左 Henry Pinto 嘅 Gundam 係傑作中嘅傑作,如果唔係點會有咁多不法之徒去利用佢嘅 Gundam 想從中獲利!

Henry Pinto Flickr 傳送門

Henry Pinto LDK Creations 作品 Facebook Page

阿九

打機 - 識少少;玩具 - 識少少;睇戲 - 識少少;動漫 - 識少少..... 買膠、派膠、分享膠!Only The Best Is Good Enough! Lego Enthusiast //goo.gl/HRnxDW

追蹤

更多文章