之前已經流出過既《生化危機》系列著名角色 Ada Wong 新造型，係日前 TGS 遊戲直播活動中正式公布啦！雖然係片段中出場既時間唔多，但係同之前流出既造型完全一致，都係著住乾濕褸 + 黑超 + 黑絲高踭鞋，至於個樣……就咁睇都幾似蘇玉華，官方就話今次造型係想符合返佢間碟既身份，唔知大家又鍾意舊 Look 定新 Look 呢？（我就覺得舊 Look 高叉晚裝正好多囉…… ）

至於最重要既當然係 Claire 既演示片段，今次片段內容有小部份地圖探索，以及同 Boss 威廉對戰。係戰鬥過程中，分別使用火炎及硫酸榴彈砲，當中火炎彈特效表現絕佳，真係比到一種好熱既感覺出黎，相反硫酸彈感覺就有啲流。

係片段中，有二點好值得留意，第一點就係 AI 既強化。係前期繞圈戰鬥時，威廉會好似以前咁跟既定路線追殺你，但係受到一定傷害之後，見到威廉會走回頭路，亦識得轉移路徑，戰鬥變得更豐富。另外唔知道係劇情變化，定係因應戰鬥既破壞，場景會產生轉變。係使用手榴彈後，似乎係場地受到太多破壞而噴出大量蒸氣，令能見度變得極低。呢點不但令遊戲更真實，而且戰鬥亦會變得更緊張刺激，好正！

《生化危機 2 重製版》預定於明年 1 月 25 日上市，對應平台為 PS4 / Xbox One / PC。