Switch版《傳說對決》試玩報告 畫面操作更勝原版

Switch版《傳說對決》本身就話舊年推出,延期到而家終於靜雞雞上架啦!等咗咁耐我地梗係第一時間下載,仲不停對戰體驗下係新平台上既對戰啦!到底拖咗咁耐,移植既質素如何?同原版又有咩分別?以下一一為你介紹!

 

 

係遊戲正式推出之前,大家一直都係度諗到底變成實體按鍵之後,操作會變成點呢?因為《傳說對決》入面有為數不少既技能,都需要用到按緊技能鍵 > 選擇施法方向 / 位置 > 放開技能鍵施法呢種方式。去到 Nintendo Switch 版本,預設按鈕將會變成 L – 1技、R – 2技、ZL – 3技、ZR – 天賦、A – 攻擊。而上面提到既施法方式,假設我地要使用 1技,就會變成 按緊 L 鍵 > 用右邊菇選擇施法方向 / 位置 > 放開 L 鍵施法,老實講施放速度比起手機版本略慢,而且感覺上有少許 Delay,需要時間適應。但係由於變成實體按鈕操作,係整體操作上會變得較為容易掌握。

 

基本按鈕排位

覺得唔順手的話,都可以自定按健

刀鋒會擔任新手教學人員

對遊戲玩法會作出簡單講解(我而家先知刀鋒叫 Butterfly……)

施法方式變得較為麻煩,需要習慣

買裝就要撳實 Y 制,再用 L 或者 R 鍵選擇買咩裝

當然亦都可以撳入商店度自定買乜

畫面靚咗好多

 

現時遊戲只有一個 Server,不過進入遊戲之後仲會有得揀地區,分別有亞洲、歐洲及北美,不過亞洲以外地區啲 Ping 高到你唔會想玩。至於連線質素方面,我地係 WiFi 連接狀態下,穩定維持係 20ms 下,表現令人滿意。

 

Server 得一個,唔洗揀

 

正式開打前,一般都會建議大家設定一下攻擊方式,可能係啱啱推出既關係,遊戲操作設置仲未係好細緻。我地測試過選擇「補兵+推塔攻擊」後,並唔會好似手機版咁分為兵、塔、英雄三個按鍵,而係統一由系統去判定。但係當攻擊範圍內同時有兵+英雄又或者塔+英雄,系統就會判定先打塔或者打兵,會完全無視敵方英雄,變相令到更難控制,希望之後會改善。

 

選項比較少

當然可以切換返語言做中文

 

另一樣大家非常關注既,就係有無得連動返去自己原本既帳號,可惜現時就仲未見到有任何相關選項。雖然係遊戲公告內見到同手機版連動會有獎勵,但係我地登入手機版就仲未見有相關活動,可能要遲少少先推出吧。

 

仲未見到相關活動

 

遊戲版本屬於早期《傳說對決》,仲係用緊舊版地圖,對新地圖不滿既玩家可以入去緬懷一下。現時只有 39 隻英雄,初始已經會有凡恩、趙雲、克里希三隻英雄送比你。雖然係咁,但係而家全部英雄都屬免費可用狀態,所以對新玩家黎講其實無乜所謂。

另外而家進行緊 14 天登入活動,只要連續登入 14 日,就可以拎到永久英雄堇同刀鋒寶貝,以及趙雲、堇同刀鋒既 Skin。

 

係呢個位進入領取

有刀鋒送,算係咁啦

仲有個好處係奧義可以用寶石買,慳唔少

 

另外由於係用返舊版本,所以連道具都變返做舊版設定。例如颶風雙刀,就由現版本既 35%攻速、25%暴擊、7%跑速(被動:暴擊後提升 35%韌性 2 秒),變為舊版既 30%攻速、20%暴擊、5%跑速(被動:提升暴擊 50% 傷害)。亦即係話可以用返舊版玩法,例如半坦凡恩。

 

回歸舊版本道具能力

 

始終 NS 版《傳說對決》仲係啱啱推出,仲有好多改善空間。作為第一隻係 Switch 上登場既 MOBA 遊戲,難免會有極多新手,同一條路有三個人、坦走中路、搶野等問題係非常常見,所以想打魚的話,而家的確係一個好時機 :)。

 

打魚 Play

 

森麻

VJGamer總編,細細個已經蒲機舖,機齡甚深,熱愛電玩文化。

追蹤

Facebook 更多文章