【商業合作】無諗過一個小動作就得到上萬網路上歡心!SEGA 寄比 Sharp 封信上面寫左乜?

 

作為日本歷史悠久嘅遊戲及平台開發商,世嘉(SEGA)一直帶比玩家好多唔同嘅歡樂同回憶;不過,原來日本有唔少年輕玩家,一直認為 SEGA 品牌形象有啲守舊同保守。呢一點我唔認同架,不過人地點諗又好難控制嘅!

然而,我相信連 SEGA 自己都無諗過,近日佢地寄比日本 SHARP Marketing 部嘅一封信,居然大幅地增加了網友對品牌嘅好感。到底佢做左乜野黎?

我地黎睇左信封正面先。而家大部份打工仔都係用電腦書寫架喇,無諗過世嘉出信位同事「字體端正」「筆劃秀麗」,備受網友大讚。不過,真正引起好感嘅並唔係呢一度……

 

 

無錯!係喺呢度!就係呢隻隨手畫嘅 Sonic,又代表到 SEGA 之餘,仲為呢封業務用嘅信件多左兩分玩味性質!Sharp 收到呢隻 Sonic 之後都不禁話「世嘉寄啲咩黎比我都已經唔再係重點了,但係我真係好想 Share 呢隻 Sonic!」

 

 

呢個 Post 擺上 Twitter 唔夠兩個鐘,已經獲得接近二萬網友讚好,大家仲異口同聲咁話「SEGA 開始識玩了!」咁樣。可能 SEGA 出信位同事今次只係無心插柳柳成蔭,不過今時今日要喺網路上面得到掌聲絕對唔容易,日本好多相關商業近年開始明白「同行唔一定如敵國,互利其實會更有用」嘅道理,先係快餐店之間搞合作,慢慢而家商社之間喺 Twitter 上面都會互動起來,不過可以喺信封度畫公仔玩味咁重嘅事,當然只有遊戲廠商先做得啦(笑)

話時話我真係想知 SEGA 寄左咩比 Sharp 架。唔通係《House of Dead》招待門券?

 

神婆

遊戲雜食向,FPS 苦手,全種類 RPG 專攻,重度聲優控。使用機種:Xbox Series X|PS5|Nintendo Switch|Steam Deck。

追蹤

Facebook 更多文章