格鬥遊戲一直以黎大多數人都覺得係波動拳 + 昇龍拳咁上下，但係近年唔知係乜啲廠商 High 大咗，繼之前出咗隻滿天神佛大亂鬥既《Fight of Gods》，最近又有一隻由 Nussoft 所製作既甲殼類海鮮大亂鬥《Fight Crab》，玩家操控既唔再係人型物體，變為各種甲殼類海鮮，即係花蟹、龍蝦等等，而且仲會有 PC 同 Switch 版，非常令人期待！

《Fight Crab》大約係今年五月正式公布，不過去到近排先正式推咗第一條 Trailer。本作屬於格鬥遊戲，但係就唔係大家見慣見熟果種波昇對決。遊戲內登場既全部都係甲殼類海產，有幾種龍蝦、幾種蟹，大家平時應該都食過。每隻海產都使用唔同武器，包括有大劍、雙刀、錘仔、飛鏢、手槍、噴射火箭等等，玩家需要操控佢地互相戰鬥，目標係將對方打到反肚超過三秒鐘，暫時見到支援三人對戰。

有鈍器有錘仔

唔係淨得近戰武器，連左輪都有得用

呢支火箭唔知想點……

最痴線既係有得出「Exculibur」，你叫 Saber 情何以堪……

如果大家有玩開呢類騎呢野，都應該對呢間日本開發商 Nussoft 唔會陌生，因為之前佢地出果隻《Ace of Seafood》都係玩海產，登場角色全部都係啲魚蝦蟹之類既野，但係佢地全部都識得射 Laser，有啲魚仲大隻過戰艦，非常騎呢。

雖然佢地推出既作品都比較痴線，但係畫面、操作、打擊感都做得唔錯，絕對有一玩既價值。《Fight Crab》尚未有確實發售，不過就已經確定會推出 PC 及 Switch版。