MOBA玩法加大逃殺 《Battlerite Royale》正式開打

講到 MOBA 類型遊戲,最為人所熟悉既當然係《英雄聯盟》、《DOTA 2》,不過今次講既就並唔係呢二款,而係係外國頗為好評既《Battlerite》(戰鬥儀式)。呢隻由 Stunlock Studios 開發既 MOBA 遊戲,創新地用咗無小兵無塔、主要玩英雄對戰既爽快設計,成功地令佢成為 Steam 上面既熱門遊戲。而佢地為咗吸引更多人落坑,最近就推出一隻結合咗 MOBA + 大逃殺玩法既遊戲《Battlerite Royale》(戰鬥儀式大逃殺)。

 

 

《Battlerite Royale》基本玩法同一般大逃殺作品一樣,同樣地有空投、搵物資、毒圈逐步縮小等等全部都有,不過戰鬥方式就變為 MOBA 類型既俯瞰視角度進行,每場最大容納三十名玩家。當然玩家所使用既角色亦都會有佢地各自既技能、玩法,場上亦有商人提供裝備、道具、技能等等,供玩家購買。

 

基本玩法講完,但係《Battlerite Royale》又點止咁簡單。首先遊戲內所有英雄既技能都係「指向性」,由於打出黎既技能並非必中,所以極考驗攻擊方既預判能力,被攻擊一方方亦都非常講求走位能力,呢點反而比較接近 FPS 類型既 PVP,但係變為俯瞰視角度又係另一種風味。

 

 

另一個有趣既地方,就係《Battlerite Royale》係地圖環境上面花既心思。地圖上有一般 MOBA 遊戲常見既草堆,只要玩家匿藏係入面,其他玩家就會睇你唔到,而障礙物後面影子同樣可以達到呢個效果。只要有效利用呢個特性,埋伏、飲水緩衝、食花生等敵人打完再出黎執雞都係常事。

 

 

雖然有草堆呢個元素,但係遊戲又做埋 FPS 遊戲常見既「腳步聲」,就算見唔到敵人,憑聲音都可以令你估到敵人既方位同大約距離。除咗腳步聲之外,使用地圖上既裝置「治療石」(係旁邊就會回血)、「飛行平台」(彈自己上天,可俯瞰整個地圖並飛去地圖另一位置)都會發出聲音並暴露自己位置,使用前要注意。

 

 

每場戰役開始時,玩家可以購買兩項技能,之後得到技能、裝備、消耗品等物資就需要靠取得物資「Orb」又或者殺其他玩家先會得到,當然仲可以用金幣同地圖上既商人購買。而每種裝備及技能都有分為 Common、Rare、Epic、Legendary 四級,而且能力影響都幾明顯下,所以如果由頭匿到尾,到決戰時自己反而會變得弱勢,呢種設定亦都係鼓勵玩家主動戰鬥,加快遊戲流程。

最後講一講《Battlerite Royale》既消耗品。除咗基本既補血藥水之外,有好多非常過癮既消耗品。例如偽裝類既可以令你變成木桶又或者係兔仔,製作類既可以做陷阱、炸彈,仲可以整個寶箱型炸彈,引人打開就「Boom」!而每位玩家分別可以有四件裝備及三種消耗品。

 

 

《Battlerite Royale》而家係 Steam 上面做緊付費測試,雖然平衡度仲有待改善,但係廠商積極地改善遊戲環境,加上遊戲趣味性、連線品質亦都非常優秀,絕對推薦大家一試。

 

《Battlerite Royale》Steam 傳送門

 

五木

動漫電玩宅,極愛金田一系列,擅長動作及策略遊戲

追蹤

更多文章