各位朋友，你地嘅 PSN ID 係咩？又或者，你地身邊有無朋友個 PSN ID 改得極為中二，中二到今時今日見到佢個名彈出黎都會笑？咁當然啦，相信大家常用嘅 PSN ID 都係創於微時，例如我身邊就有朋友嘅 ID 仲係「Super_Lover」呢啲散發著濃烈 90 年代過氣潮物嘅名字。

如果你想改名，PlayStation 日前公佈嘅呢個消息，就絕對係你嘅福音！喺 10 月 10 日 PlayStation 官方網誌上面宣佈即將開放「PSN 用戶改名」機能，11 月將會為事前申請 Beta 嘅用家進行 Demo Test，去到 2019 年初將會全面實施計劃。

到時，玩家首次改名將不會收取任何費用，其後每次更改名字，非 PS Plus 會員收費為 USD 9.99；PS Plus 會員則為 USD 4.99；港幣或日服收費就有待各地再公佈。

更改 PSN ID 即係呢個位（我個 ID 就唔中二嘅，又或者得我自己先知中二喺邊度…lol）

圖攝自手機 PS Store App

如果怕機友們唔認得你，你可以揀喺新 ID 隔離同時顯示返你嘅舊 ID；不過，Sony 就話呢個選項一旦實行，你就無得再隱藏返個舊 ID 架喇，所以聽落好似有啲唔知做乜咁。所以，改 ID 嘅朋友，要唔要同時 Show 自己舊 ID，請三思啦！呢個 Option 加錢都無得改架！

呢個「PSN 改名」機能將全面支援 2018 年 4 月 1 日後推出嘅 PS4 遊戲；如果係舊 Game 或者 PS3／PSV 平台上面有記錄你 ID 名嘅遊戲，或者就未能支援更改了。

唔知呢個功能又適唔適合你？