【讀者投稿】Marvel’s Spider-Man – 蜘蛛仔我睇好你架!

文今次唔長,但涉及劇透,總結在最尾,想睇評分可直接跳到最後。

對於蜘蛛仔呢隻Game, 個人既心情真係好複雜。一方面佢已經係超級英雄遊戲入面既一線曙光,仲順手幫埋蜘蛛俠遊戲呢個牌子一洗頹風,可以話係功德無量。另一方面呢,你玩落佢就硬係差少少…….整體遊戲設計同埋執行只係差好少既距離,就可以上到神枱,爆機之後,真係不得不為此傷心。

做一個蜘蛛俠!

要明白遊戲既優點同缺點之前,首先要明白遊戲既本意係想做乜先。就正如所有動作冒險既遊戲,或者係所有RPG 一樣,你就係要做果個主角!你就係要做Spider-man, 或者Batman Arkham 系列咁,你就係要做Batman!遊戲既所有規則同埋細節位越能夠令你覺得自己就係果個主角既就越好,如果偏離左呢個方向既就會變成缺點。

係呢個評分準則之下,你唔難發現呢隻Spider-man 幾乎攞齊所有分數︰

  1. 係紐約市蕩來蕩去既時候,你既蜘蛛絲真係有痴住某樣野,而唔係淩空咁就蕩到
  2. 你係有機會不停咁救人,做個社區朋友,而同時會得到相應既回報
  3. 每次見到任何敵人佢都係咁嘴賤
  4. 你可以用Spider-man 同Peter Parker 既身份分別同唔同既角色建立關係,除左Spider-man 之外,觀眾其實亦會好奇Peter Parker 本身係一個點樣既人,佢係現實生活中遇到既事同樣會影響佢成為Spider-man 時既決定。
  5. 遊戲入面每一個樣要收集既野都有佢既故事份量。尤其係自己既背囊,除左可以比玩家體會返咁耐以來既Spider-man 歷史之外,其中仲有精美物品鑑賞同埋配音話你知之前做過乜,真係好有心機
  6. 係相對地短既時間入面,講左好多個壞蛋佢地本身既動機同性格特徵。用非常有限既資源令你明白蜘蛛俠咁多年來既世界觀同一時間令打敗果堆敵人可以有情感上既效果。呢個真係好犀利。
  7. 戰鬥上來講製作組明顯花左好多心思去諗住,如果真係佢打緊交,佢會有咩可以做?或者係漫畫動畫入面,佢係點打交?隨時隨地可以用來Fing 既渠蓋同垃圾桶,可以用道具整暈對手,可以用直接將難搞既敵人黐係牆身車身,仲可以黐牆反身來個Rider Kick!! 基本上所有得Spider-man 可以用既招式都用齊哂。
  8. BOSS 戰真係世界級,近呢幾年都未見過咁高質,咁好玩有趣既戰鬥!

就以上種種大家都已經明白呢個遊戲係會非常高分,但同時,我地亦都唔能夠唔參考神台上面超級英雄遊戲,Batman Arkham 系列,來比較下點解佢仲係差少少。

做Peter Parker 可以,但其他人有必要咩?

我明白有時為左描寫Spider-man 既其他角色,係可能有需要用一用佢地來做主角。但係….Mary Jane 同Miles 果Part 真係唔好玩嘛!個潛行部份又唔係話特別有挑戰性(礙於佢兩個係普通人而唔係Solid Snake 所以冇辦法更有挑戰性,會玩唔到落去),而又唔係有特別設計同巧思 (自由度低到同得一條路冇乜分別,咁整做動畫都得啦,使乜我去潛啫!)

將佢地兩個既部份變成咁長一部份既遊戲內容根本上就係錯誤決定,唔會有人覺得係啱或者好好玩。我上面講果堆就好玩,Mary Jane 係咪識一個打十幾個丫?同埋Miles 過條馬路都要玩,你唔好Aunt May 落樓下照顧露宿者都開一節來玩?

壞人始終唔夠魅力

“Heros are only as good as their villains.” 呢句野係所有對立角色既劇本上面都完全會通用。可惜既係呢隻Game 入面冇一個人勁得過Peter Parker,或者只係一樣勁…….先唔講果班比八爪博士控制既雜魚…..就連八爪博士本身,係自己隻手研發既過程中,都係靠Peter Parker 幫手……..

我都唔好意思用Joker 來做對比,求其一個謎語人都已經收哂你地皮啦…….

遊戲去到最後都拎唔出一個真正令人感到絕望同痛苦既超級壞人,可能係鋪排緊下一集,但係就將今集既Spider-man 本身拉低左一個層次!而且遊戲入面佢仲要唔係啱啱開始做蜘蛛俠,而係已經做左八年,仲要打呢D 低級壞人(係遊戲設計上特登整到好低級既壞人) 咁點對得住個主角呀!

個戰鬥始終差少少

蜘蛛俠既戰鬥好多人話似係Batman Arkham 系列照抄,但其實唔係。因為Spider-man 呢種叫閃避反擊,而Batman 係防守反擊。有玩過既朋友可以留意下Spider-man 係從未試過格擋敵人既任何攻擊,只會避開,而呢種設計係因PS2 既Spider-man 2 搬到而家,係Spider-man 遊戲原創架。係遊戲設計上佢跳過左Batman 既框框,佢唔會再守係有人打佢,佢格開必定會lock 死左係格擋動畫呢個套路上面,反而佢可以閃完再自己跳來跳去,係連技方面比起Batman 會冇咁公式化同埋多更多機會用道具。

相反地,就少左好多規則帶比大家既快感。點解Batman 個戰鬥系列咁多人想抄?而只要你抄得足,你隻Game 整任何題材,都唔會差。實際上佢由按鍵,到使出招式既瞬間,到格擋既動畫,到打向另一個人既判定,到敵人既反應動畫。每一格,係每一格,都要精心設計同量度過。你玩完會有一種前所未有既快感,因為每一拳你都覺得好有打擊感,而每一下格擋都令你覺得你就係Batman 你真係好勁,而每一次格唔到都一定係你自己撳錯而唔係遊戲有問題,每一個敵人都有相應既打法,公平得來有滿足感………..

而Spider-man 呢………佢個自框係鎖住左我前面果個人,但Spider-man 係打緊佢自己前面即係係鏡頭睇唔到果個人……..我唔知係BUG 定係設計時既忽略, 我有時會對打鬥中既Spider-man 失去控制,有啲有移動能力既連技仲有時會連到我跌左出大廈天台……..

無論你打左幾個人,有幾熟習,最後你都唔能夠保證你可以根據敵人既種類同埋自身既能力,好順利咁解決一場戰鬥。唔係個技能玩你,就係個敵人玩你或者個地型玩你。每一場戰鬥既完結,你都會鬆一口氣,今次好彩冇比佢玩到,又過一關……係好彩地你脫離左令人煩躁既戰鬥,咁唔係一件好事。

太 多 BUGS 喇!

遊戲就已經推出左成個月,可能好多BUG 已經修正左,但係我都只能夠用我玩果段時間見過既BUG 來做評論。圖同片相信已經outdate 就算了,我亦相信製作組都連夜趕工整返更新比大家,冇人想有BUG 既。

追車但架車冇開過,架車行行下成部消失,Spider-man 自己變哂形諸如此類。係一個PS4 獨佔既遊戲入面,有咁多嚴重既失誤的確非常令人反感。

總結︰下次繼續努力啦

遊戲基礎分︰95

除左 Rock Steady 既 Batman Arkham 系列之外,呢個 Insomnic Games 既Spider-man 可以話係超級英雄遊戲界既唯一曙光。整體上令人感覺到真係做緊蜘蛛俠,只係差少少技術上既問題就可以上神枱。

  • +音樂,建築物,敵人同道具等等細節位又有真實參考又有漫畫元素,真係令人置身在一個可信既蜘蛛俠世界一樣

 

  • -打鬥可以處理得更好
  • -下次整好D BUGS 先出街

最終評分︰89

蜘蛛仔我睇好你架!

Peter The Gamer

Peter The Gamer 人生如遊戲,我就係PETER,玩既係人生,唔會有個更好既名。 有時寫下評論,多數介紹下GAME。分享、批判遊戲。

追蹤

Facebook 更多文章