早前同大家介紹過由法國 Indie 遊戲工作室 Cyanide Studio 開發嘅第一視點探索遊戲《Call Of Cthulhu 克蘇魯的呼喚》，今日即將上市啦！對應平台為 PS4、XBox One 以及 PC，官方定價 HKD 398。
雖然我明白呢期大家嘅注意力都擺喺《RDR2》上面，但係，我亦知道有部份朋友並無做牛仔嘅打算；既然係咁，唔知我呢篇感想文，會唔會引起你嘅興趣，從而提供到另一種選擇比你地呢？
唔好問點解個 Game 今日出我已經寫到感想文！這是遊戲網站編輯（偶爾）有的福利！LOL
講明係細廠出品，當然我就唔會期待有 3A 大作一樣嘅畫質；不過，作為一隻第一視點嘅遊戲，《克蘇魯》嘅畫面及角度切換做得算係咁了，場景多變之餘，為左呈現美國 1924 年代嘅質樸感，遊戲當中嘅每個視點都做得非常細緻，材質亦好努力地表現出唔同環境嘅氛圍，可見工作室嘅用心。
主角 Edward 係一個退役軍人，成為私家偵探後，佢接到一個 Case，就係一名父親覺得自己個女 Sarah 嘅死因有可疑，所以希望你黎查明真相。咁但係，故事一開頭已經講到明，Sarah 係一個專畫「心靈恐怖系畫」而成名嘅畫家，而坊間亦一直盛傳佢有精神問題……故事就係喺呢個設定中開始。
主角間偵探社
《克蘇魯》係一個劇情主導嘅遊戲，所以我亦唔喺故事上著墨太多，講哂出黎你地玩時就無癮了！不過，我可以話你知，一開 Game 嘅時候，你或者會覺得「好平淡啫」「無乜野呀」，但係，如果你有心玩完頭兩章（其實即係幫你熟習遊戲），到你正式進入 Sarah 生前居住嘅大屋之後，你，或者就會同我一樣，開始比故事一環又一環嘅疑團同埋神秘伏線吸引，然後就會一口氣玩落去。
遊戲操作簡單，但係同一個選項都會對劇情做成微妙變化，而每個選項會否喺劇情中出現，亦同玩家自己本身嘅能力值好有關係。
如果你玩實務鬼祟派，可以加哂啲能力點落「說得」「調查」呢啲能力上面，咁或者可以搵到一啲線索，令你喺劇情中搵到 Short Cut；如果你想行靈探路線（！），就可以加強自己精神感應力……
唔同玩法會影響你嘅進展，我開頭諗住平平均均發展，結果反而東不成西不就；大家玩嘅時候，可以試下做極端鬥士架！LOL
對話可以得到唔同資料（但如果你份人乞人憎，佢可能會淨係串你，唔理你～）
我本身係一個非常唔擅長玩第一視點遊戲嘅人，剛剛開 Game 之時，劇情未入戲肉，所以還好；但係去到後期，劇情急轉直下，環境 Keep 住幽暗、黏濕……你話佢恐怖又唔係，但係，你嘅心理壓力會不斷增強，同時又很好奇個故事之後點發展，所以，我就算玩第一視點玩到頭暈，我都忍唔住玩埋落去。
調查點會有光點亮起
入到大宅之後，好黑，可以用隨身火機作為光源（但用得耐會辣手 XD）
然後隨住劇情推進，啲場景開始越變越……怪……
咁遊戲話明係改篇自小說《Call Of Cthulhu》，又點會無啲象徵式嘅「敵人」呢？如果有玩過《Bloodborne》嘅朋友，相信你地一定對遊戲裡面啲觸手呀、黏稠 Play 有好深印象，呢種黎自「異域」「海底」嘅東西，相信係「克蘇魯神話」其中一樣最明顯嘅野……
噁！
如果要我總括地介紹呢個遊戲，我只能夠講，佢嘅劇本，越玩就越令你分唔清，邊個係真、邊個係假；到底係世界出左事，定係自己痴左線。
《克蘇魯》一日未玩到最後，你都唔知真相係點。
對於鍾意深度劇情、或者唔想玩激烈動作遊戲嘅朋友，《克蘇魯》或者係你近期唔錯嘅選擇，遊戲裡面以劇情為主，有少量動作元素（例如要躲避其他人捉捕等等），有心機嘅，一個周末絕對玩得哂～
遊戲 10 月 30 日發售，中英文合版，美中不足嘅地方係中文版係簡體；慶幸係英文版用字亦都簡單易明，如果你黎緊想過一個操作輕鬆（但係會有心理壓力）嘅周末，不妨考慮入手《Call Of Cthulhu 克蘇魯的呼喚》。
最後送上遊戲最新 Trailer：
遊戲雜食向，FPS 苦手，全種類 RPG 專攻，重度聲優控。使用機種：Xbox Series X｜PS5｜Nintendo Switch｜Steam Deck。