重視上網打機速度嘅朋友，一定無可能唔知道「NETGEAR」嘅大名，佢旗下嘅專業系列「Nighthawk Pro Gaming」喺 10 月 25 日就推出咗全新 Router「XR700」。

呢部 XR700 絕對係為重視打機網速質素嘅玩家度身打造，淨係鋼琴黑流線型設計已經型絕其他同類產品，當然 Router 好唔好，外表當然唔係最重要，重要嘅係佢嘅速度。

XR700 係全球首款 AD WiFi 電競路由器，最高速度可達 7200，仲有 7 個傳輸速度最高可以達到 1000Mbps 嘅 LAN 插口；當中 LAN 1 和 LAN 2 插口更加支援 Link Aggregation「鏈路聚合」技術，有效加速 NAS 等裝置嘅速度。除此之外，仲有 1 個 10Gbps 級別 SPF+ 網絡連接埠，以及 2 個 USB3.0 插口。

Nighthawk Pro Gaming 系列 Wi-Fi Router 全部內建專屬嘅「DumaOS 電競提昇系統」，導入商業級封包檢測技術，功能包括：

（1）可即時進行視覺化調整的 QoS；
（2）找出最佳遊戲伺服器連線的 Geo Filter（地理篩選）

或者就咁講啲 Terms 大家未必即刻明，所以我會簡單地解釋一下比大家知。

第一項「可視覺化調整嘅 Qos」，即係屋企個 Wifi 流量可以完全由你控制，當你母親大人喺隔離房 DL 緊劇嘅時候，你有無試過感到個網即刻窒咗？有呢個機能之後，Wifi 在你手，啲 Quota 梗係撥哂比自己啦～LOL

呢項功能未算最特別，第二項 Geo Filter 先係重頭戲，簡單黎講，就係監察住你成個網絡活動狀況，務度將遊戲延遲降至最低！打開聯機 Game 嘅一定明，無論係《Call Op4》定係《Gundam Versus》，Lag 機甚至斷線係幾咁令人無癮嘅一件事，相信都唔駛我多講，係咪先～

根據官方資料，呢部 XR700 嘅優點共有以下幾樣：

● 全球首款 AD WiFi 電競路由器
● 4 根主動式天線信號更強更穩
● 2.4GHz / 5GHz / 60GHz 三頻傳輸
● 支援乙太網鏈路聚合技術● 提供 10Gbps 級別 SPF+ 插槽
● 專屬 DumaOS 電競優化系統
● 自定流量分配準則

不過呢部 XR700 既然咁高端，價錢當然都有一定份量，目前官方定價為 HKD4,280！可能你見到個價位會有啲卻步，為咗證明佢物超所值，我地編輯部黎緊即將為呢部 Router 進行網速實測！有興趣了解更多嘅朋友，你要即刻課金當然可以，想睇埋我地嘅評測，就記得繼續留意我地嘅報導啦！

【銷售地點傳送門】
【XR700 官方商店】