【異國風情畫】融合 Zelda 與 Mario Odyssey 玩法・3D 冒險 RPG《ELLI》Switch 登場

 

如果你鍾意玩《Zelda》或者《Mario Odyssey》,今次同大家介紹呢隻名為《ELLI》嘅 3D 探索遊戲或者會幾適合你。遊戲由瑞典獨立遊戲工作室「Bandana Kid」開發,對應平台為 Switch。

玩家飾演女主角 Elli,身份係「時間的守護者」,因為重要嘅水晶被人偷走左,為咗搵返水晶,所以女主角踏上旅途,決心要穿越試煉之地 Mandragora。故事大綱,大概係咁樣。

但係相信玩呢類歷險遊戲嘅朋友,其實對於故事主線未必太在意(喂),重點,絕對係遊戲系統。

Elli 嘅旅程,一路上要穿越好多迷宮同神殿,呢啲地方各有機關,有啲考反應,有啲考你腦力,如果玩過《薩爾達傳說:荒野之息》或者會好有親切感,因為正正係我地玩神殿時嗰種玩法!

 

 

咁但係遊戲並唔係 Open World 的,佢嘅冒險方式比較似係《Mario Odyssey》形式嘅 3D 歷險,要跳躍閃避,地圖上亦有唔同裝備或者晶石可以收集;但係部份場景又會刻意造成模仿 2D 捲軸橫向一樣嘅推進玩法,以獨立遊戲黎講真係超多元素。

 

 

《ELLI》 全個遊戲都嘗試活用 Switch 嘅機能去開發,開發引擎為 Unreal Engine 4,所以動作靈活度絕對可以放心;而遊戲裡面嘅 BGM 充滿異國風情,似乎都好配合遊戲成個故事設定架!

遊戲正式上架日仲未公佈,但係如果你想了解多啲,不如睇埋以下呢條 Trailer:

 

神婆

遊戲雜食向,FPS 苦手,全種類 RPG 專攻,重度聲優控。使用機種:Xbox Series X|PS5|Nintendo Switch|Steam Deck。

追蹤

Facebook 更多文章