【百變星君】Netflix《Witcher》電視劇男主角造型公開引起熱議!似《魔戒》精靈王定係《哈利波特》馬份老竇?

 

自從《Netflix》宣佈開拍《The Witcher》真人版之後,一直備受網民關注,事關呢套作品無論係原著小說定係遊戲,都喺全球擁有大量 Fans,到底佢拍成電視劇又會係點呢?

 

 

說時遲那時快,官方尋日就公佈咗由前 DC 超人 Henry Cavill 飾演嘅男主角 Geralt 嘅造型,我唔評論住,大家睇咗先:

 

 

消息一公佈,成功馬上造成網上熱話,但係啲評語似乎都幾一面倒地話「唔係好似噃」咁樣,主要原因,係因為呢個 Geralt 太青靚白淨、太偶像派、太唔兇狠咁話!

 

 

咁我明嘅,作為一個野外生活嘅人,啲頭髮又真係順滑得濟嘅!Fandom 仲打趣咁出左以下呢條 Tweet:

 

 

無錯!佢地意思就係話呢個版本嘅 Geralt,相比 Witcher 似乎更有《魔戒》 由 Orlando Bloom 飾演嘅精靈王之子 Legolas,又或者係《哈利波特》入面由 Jason Isaacs 飾演嘅馬份老竇Lucius Malfoy;仲有網友笑話似《魔戒》年輕版甘道夫,真係千奇百趣,多變元素多過百變星君!

 

 

不過,又講句公道說話,真人飾演一個二次元人物,又真係好難神還原嘅,套劇一日未播,都好難落定論呢個作品係好定係唔好。呢套於東歐拍攝緊嘅《The Witcher》喺 2019 年就有得睇,各位又有無興趣開黎追番呢?

 

神婆

神婆 非典型占卜師,唔神秘,無形象,除了鐘意聽客人講故事,夜間興趣係打機睇動漫同玩貓;日系遊戲及 JRPG 專攻! https://www.facebook.com/katechengyk

追蹤

Facebook 更多文章