【地獄之火】《Red Dead 2》神秘地點發見!馬一行過就會即刻自焚死?

 

相信喺《Red Dead Redemption 2》裡面做緊牛仔嘅朋友都玩到如火如荼,而如果你同我一樣鍾意周圍行,死都唔去做主線任務嘅話,我諗,你地耐唔耐應該會喺地圖上面發現一啲奇怪地點,但又唔係支線任務,非常耐人尋味。

早前我就搵到一個似乎同外星人有關嘅邪教集體自殺廢墟,正當我上網搵緊有無朋友同我一樣見到呢個地點嘅時候,比我見到網友嘅其他爆笑(?)大發現!

 

 

你無睇錯!隻馬的確係無啦啦著火!正當我想了解更多嘅時候,發現原來已經有好多玩家都曾經路過呢度,同樣地隻馬行行下自焚,唔少玩家仲話「我未 Save 架!」一路睇住自己嘅愛馬被燒死,真係超級唔開心咁樣。

呢個被網友戲稱為「地獄之門」嘅馬匹自焚熱點(?)位於地圖南邊 Rhodes 嘅呢條路,有興趣嘅玩家可以參考一下:

 

 

根據外媒 GameRevolution 報導,呢個神秘焚燒 Play 到而家都未有正確解釋,相信都係 Bug 居多;不過,正當有玩家因為呢一點而嬲豬嘅時候,亦都有玩家反其道而行,利用呢個 Burning Point 為自己帶來歡樂。

 

特登儲到一地屍體 LOL

 

網友 Haruna Miyazawa 早前就喺 Youtube 上載咗呢條片段,大家睇完都紛紛表示「Rockstar 千祈唔好出 Patch」黎修正呢個 Bug;我只能講嘅係呢位網友超好心機,睇佢片入面死馬嘅數量,佢應該喺原地企咗好耐 LOL

 

 

一日未爆機,我都相信呢個遊戲仲有好多樂趣有待大家發現,大家有啲咩有趣片段圖片,我地都歡迎你同我地分享架!

 

神婆

神婆 非典型占卜師,唔神秘,無形象,除了鐘意聽客人講故事,夜間興趣係打機睇動漫同玩貓;日系遊戲及 JRPG 專攻! https://www.facebook.com/katechengyk

追蹤

Facebook 更多文章