曾經係唔少 80～90 年代朋友仔回憶嘅電子寵物「他媽哥池」系列有新企劃，即將於 2019 年 1 月 26 日推出與《Pokemon 寵物小精靈》（OK 我知官方名係《精靈寶可夢》）嘅新產品，而大家可以飼養嘅，係同比卡超人氣不相上下嘅伊貝 BB！

產品共有兩款，分別為「だいすきイーブイver.（最愛伊貝」以及「カラフルフレンズver.（多彩朋友）」，而喺大家養育之下，伊貝一共有八種進化可能，包括水伊貝、火伊貝、雷伊貝、太陽伊貝、月亮伊貝、冰伊貝、精靈伊貝。（台港譯名略有不同，如果港版名字有寫錯的話歡迎留言指正）

據說仲有幾個隱藏形態，會入手嘅玩家請多多鑽研了。

玩法同以前嘅電子寵物雞好類似，除左餵食仲要同佢玩，放置一陣話唔定會見到佢啲毛變成毛球咁要你清理、或者見到佢自己玩得好開心；但係如果長期唔理佢，伊貝就會逃離精靈球離開你了 T_T

兩款伊貝他媽哥池定價為 2,484円（連税），無論係買黎自己珍藏，定係買黎打發女朋友做情人節禮物（利申我無…）都係萌萌的選擇；目前並無話優先預購有咩優惠，香港玩家可以去相熟嘅玩具店查詢訂購。