【試玩評測】《隻狼:暗影雙死》試玩台首現香港 難度超越過往作品

作為重度自虐玩家,當 From Software 公布佢地最新作品 《隻狼:暗影雙死》(Sekiro: Shadows Die Twice)之後,就充滿期待。係今年東京遊戲展上面,首次開放比公眾試玩,而係今日位於旺角家樂坊,正式開幕既「聖誕玩樂 LIVE 小鎮」入面大家都可以玩到《隻狼:暗影雙死》,當然我地已經率先試完,約略同大家講下遊戲感想啦!

 

 

今次想同大家分享既主要係遊戲玩法同難係邊度,遊戲畫面之類都係留返比大家感受啦,總之唔會失禮。

首先係遊戲玩法,同《Dark Soul》、《BloodBorne》系列唔同,普通攻擊鍵只有 R1,並無輕重之分(配合不同操作方法可使出其他斬擊)。係體驗版入面主要使用按鍵分別係:R1(攻擊)、L1(格擋)、L2(飛索)、X(跳躍)及 O(閃避)。

 

係《隻狼:暗影雙死》入面,加入「忍殺」呢個動作,簡單講即係背刺暗殺,如果敵方無發現你既情況下,空中跳入同樣可以施展,而一般中頭目或精英怪都需要使用「忍殺」擊倒。聰明既讀者睇到呢度應該就會問:「咁正面對決果陣點出忍殺?」,答案就係今集新增既「格擋值」。

 

畫面正上方果行就係「格擋值」,一定時間無增加就會慢慢減少

 

當敵人攻擊時,玩家把握時機,係接近被擊中前使用 L1(格擋),成功的話會出現紅色火光,以及會大量增加敵人「格擋值」,當「格擋值」滿咗就可以接近使出「忍殺」。如果玩家唔係適當時間格擋對方攻擊,就會變成自身增加「格擋值」,所以點樣捕捉敵人攻擊節奏、時機就變得非常重要。當然你都可以玩閃避流,逐刀逐刀咁去劈敵人,「格擋值」都會慢慢上升,不過唔知劈到何年何月咁解。

 

玩家同樣會有「格擋值」,起勢咁擋會爆防,跟住咪……

 

另一樣同以往作品唔同既地方,就係敵方攻擊會分為「上段」同「下段」。大家玩其他系列慣常用閃避 / 翻滾就可以避到敵人攻擊,但係今集有清楚寫明「下段」係需要用跳躍黎閃避的,遺憾地係體驗版入面試唔到呢樣野,期待正式推出時會有幾刺激。

 

今次真真正正有得跳阿,試過幾次跳咗落街……

 

最後想同大家分享下點解《隻狼:暗影雙死》難度超越過往作品,先講我地係體驗版入面都係打到去大佬「破戒僧」,最高紀錄係打走佢 2 行血,無法擊敗佢。不過係遊玩過程中都可以綜合返比大家聽點解咁難玩。

首先係上面講既「格擋值」系統,係 From Software 其他系列,即使全程唔同盾反 / 槍反都可以順利爆機無問題,而且就算玩都係成功一下就令對方進入硬值,唔係好似本作咁要幾十下先得。當黎到《隻狼:暗影雙死》,玩家基本上無得唔玩格擋流(出咗可能有痴線佬都唔定),加上敵人攻擊力奇高,變相極大地提高難度,此其一。

 

 

其次就係打頭目或精英怪需要使用「忍殺」,亦即係玩家只有打爆對方「格擋值」一途。當玩家辛辛苦苦打爆「格擋值」,諗住行埋去用「忍殺」既時候,往往會出現唔同狀況。我地試過打爆「格擋值」一刻,同時中招,雙雙進入硬直狀態,當玩家恢復時,敵方「格擋值」亦都同時恢復,麻煩再打過。亦試過錯位置,無法使出「忍殺」,此為難處二。

 

有「危」字出現代表一定要閃避

 

再者今次遊戲並無多人連線模式,亦即係話玩家需要單獨面對各種強大敵人,對唔少玩家黎講絕對係更加困難。(雖然我不嬲玩單挑)

總括黎講,今次《隻狼:暗影雙死》我非常之滿意,雖然暫時只有體驗版內容,仲未試到官方所講既唔同刀法流派,但係動作成份已經令我玩到唔想走,趁呢段時間旺角家樂坊 20/F 有試玩台,大家記得把握機會去體驗下!

《隻狼:暗影雙死》將於 2019 年 3 月 22 日推出,對應平台為 PlayStation 4, Xbox One, PC。

 

森麻

VJGamer總編,細細個已經蒲機舖,機齡甚深,熱愛電玩文化。

追蹤

Facebook 更多文章