今年 LEGO Ideas 就出左個 21315 Pop-Up Book，暫時就未見到好多玩家將佢改到天花龍鳳，不過都叫引到一啲玩家喺當中拎到啲頭緒。

就咁睇以下呢棵聖誕樹係咪好似同普通 LEGO 砌嘅聖誕樹差唔多，不過仔細望真啲原來當中係有小小機關架！

你以為佢只係聖誕樹？

樹身其實有機關褶得埋

合埋原來係聖誕老人喺屋頂，準備送禮物比小朋友啊！

原來呢棵 Pop Up Christmas Tree 係嚟自有好一排冇見嘅 Leo Wong 新作，如果大家仲記得上年有個用 31058 Mighty Dinosaurs 去做 AMOC 嘅比賽冠軍 – 東方神鳥，就係嚟自佢嘅出品！

今次佢嘅 Pop Up Christmas Tree 嘅原概念係嚟自立體賀咭，雖然上年佢都用 LEGO 砌過立體聖誕卡，不過今次就想比大家多啲驚喜，所以只係用左短短兩星期就有由間屋去變化成聖誕樹嘅呢個構想。

而樹上吊飾點解會加上去，原來係因為佈置聖誕樹呢個活動係有住一份家庭溫暖，一家人裝飾聖誕樹亦係一份樂趣，所以先特登加上一串嘅飾品去點綴。

二百零塊就可以砌到咁有心思嘅作品，聖誕節仲有一個月，大家都試試落手整返棵送比你著緊嘅人！