【日系風格】幻想風橫向動作解謎遊戲《FORGOTTEN ANNE》2019 年三平台登錄

 

如果你對 8~90 年代動畫 OVA 有份情意結的話,今次介紹呢隻遊戲或者好啱你口味。《Forgotten Anne》由丹麥獨立遊戲工作室 ThroughLine Games 開發,係一隻仿 2D 橫向嘅動作解謎遊戲,將於 2019 年 2 月 28 日推出,登錄平台為 PS4、XBox 及 Switch。

 

 

ThroughLine Games 一直希望創造出「以劇情主導」嘅冒險遊戲,而《Forgotten Anne》正正為大家帶來一個獨特世界觀嘅幻想風故事。

遊戲裡面嘅世界名為「Forgotten Land」,喺現實生活入面,所有被遺忘的、或者被遺失的事物,都會傳送到呢片「被遺忘之地」。故事起初並無交代點解主角 Anne 以及佢嘅師父ボンク會生活喺「被遺忘之地」呢個世界,不過,佢地嘅身份就係負責維持兩個世界嘅平衡,希望可以將「被遺忘之地」裡面嘅事物,傳送返去現實世界,回到主人嘅身邊。

 

 

劇本大綱留低好多懸念,呢度就留待玩家到時自己感受了。遊戲畫面係以製作動畫嘅方式繪作的,例如女主角 Anne 嘅所有動作,都係人手逐個細項繪畫出黎;驟眼睇嘅時候,頗有當年《天空之城》年代動畫嘅味道。

遊戲採用仿 2D 橫向推進模式,不過地圖可以上下移動,而 Anne 亦都唔係主力要打怪過關,而係從探索過程中,將全個故事帶比玩家,同時亦要面對好多需要花腦力嘅解謎關卡,可以話係一隻不一樣風格嘅 RPG。

 

 

最後為大家送上《Forgotten Anne》 遊戲 Trailer,唔知又會唔會引起你嘅興趣呢?

 

神婆

遊戲雜食向,FPS 苦手,全種類 RPG 專攻,重度聲優控。使用機種:Xbox Series X|PS5|Nintendo Switch|Steam Deck。

追蹤

Facebook 更多文章