即將於 2019 年 1 月 25 日推出嘅《Biohazard RE:2》，相信大家都知道遊戲裡面即將會重現當年嘅豆腐模式「The 豆腐 Survivor」，而喺前日嘅「Biohazard RE:2 Special 公開生放送」網站節目入面，製作人神田剛先生就提到更多有關豆腐嘅資訊。

無錯，你無睇錯，係「豆腐」嘅資訊，而唔係「豆腐模式」嘅資訊。

話說早前有記者問神田先生，提到「喂遊戲入面嘅豆腐模組整得好像真呀，點樣整出黎架？」咁話；神田先生就話，今次舊豆腐係團隊好用心地去搵真實豆腐返黎做 Skin 架，所以一定似架！

咁相信大家都明白日本人做事係非常一絲不苟，記者聽到呢度，繼續好認真咁追問「咁到底係邊種豆腐呢？係木棉定係絹豆腐？」

登登登登！大家喺上圖見到呢舊豆腐，原來係出自京都名店「男前豆腐店」出品嘅木棉豆腐！而呢家豆腐店為左配合遊戲嘅推出，仲會喺遊戲發售當日，當時將特別版木棉豆腐上架，個包裝是咁的：

……同恐怖喪屍遊戲 Crossover 嘅豆腐，真係諗起都必有一番風味！呢期會去日本旅行嘅朋友不妨留意下買黎珍藏（？！！）啦～