香港地未必個個都識跳開心舞，不過相信大部份人細個果陣都好怕黑，硬係覺得黑媽媽果陣會有野走出黎，見到有光既時候先會安心返。如果你都有過類似既感受，呢隻恐怖逃命新作《Those Who Remain》就啱你啦，事關係遊戲入面有光既地方就等於安全！
《Those Who Remain》由獨立遊戲工作室 Camel 101 製作，屬於恐怖驚悚冒險遊戲。遊戲講述主角去到一個叫做多蒙特既和平小鎮，不過呢度已經變得破落兼詭異。而且鎮上仲滿佈住大量既怪物係街道之間徘徊，正常人見到咁既情況就梗係掉頭閃人，不過我地既主角就決定係呢個黑暗世界之中探索小鎮既真相，拯救無法脫困既人。（睇故唔好駁故啦）
雖然遊戲入面周圍都係怪物，不過又未至於無望既，因為呢班怪物全部都係怕光的，只要你企係有光既地方就安全（可能有類似《Alan Wake》既電筒退敵）。而係公開既影片入面，未見到有戰鬥元素，相信係類似《Outlast》咁主要靠逃跑同隱匿去避開啲怪物。另外遊戲內仲會有傳送門，不過呢個傳送門就係傳送你去鏡像世界入面，如果有睇過《Stranger Thing》（怪奇物語）就大約明白係咩一回事。而二個世界之間仲會有一定程度既關連，係面世界發生既事會影響鏡像世界，反之亦然。
遊戲內除咗避怪乜之外，仲會有解謎元素，不過難度係點就未知。另外玩家係遊戲過程中因應唔同行為亦會影響結局既走向，主要分為三個結局，分別係欺辱、不忠同自殺。
《Those Who Remain》預計於 2019 年發售，對應平台 PS4 / Xbox One / Switch / PC。另外 Steam 版會支援簡體中文。
VJGamer總編，細細個已經蒲機舖，機齡甚深，熱愛電玩文化。