【遊戲感想】HD 版《人中之龍 4》作為一個舊玩家,我喺遊戲中搵到呢種樂趣……

 

《人中之龍》系列嘅 HD 化 PS4 移植企劃終於黎到第四集《人中之龍 4 HD》,對於舊玩家如我黎講,呢個 HD 企劃相信係一種回憶,但對於新 Fans 黎講,我相信如果系列能夠好似《1~2》咁樣推出「極」重製版,相信效果一定會更理想,畢竟上次嘅《人龍 3 HD》嘅系統同畫面的確太貼近 PS3 年代質素嘅遊戲了。

咁黎到《人龍 4 HD》又點呢?

作為一個《人龍》系列死忠 Fans,每集遊戲嘅故事我當然唔會再感到咩新鮮感,《人龍 4》係系列首次唔再以桐生一馬為惟一,而係同時起用四位唔同背景嘅角色,採用「以四種視點去推進故事」嘅玩法,當年首次玩《4》時,的確非常有新鮮感,一來我自己幾鍾意「秋山駿」呢個角色,二來「谷村正義」當年係以演員「成宮寛貴」作為角色模組,記得嗰時睇完佢做新版《金田一》日劇裡面嘅高遠遙一就覺得佢好鬼型!

不過,當然,時代是會變的。時至今日,成宮寛貴因為疑似吸毒問題已經半流放於日本演藝圈,雖然唔知佢仲會唔會東山再起,然而日本嘅自肅文化是很強大的,「谷村正義」嘅模組黎到《人龍 4 HD》在外表上修正了不少,聲音亦都搵新一代人氣聲優增田俊樹全部重新配音。

如果你問我《人龍 4 HD》同原版最大變化係乜野,咪就係「谷村正義」囉。

 

原本成宮版

新版

 

《人龍 4》故事以「金村興業組長被殺」一事為契機,從而帶出今集主角組織東城會以及上野誠和會之間嘅故事,咁玩過《人龍》嘅朋友都會知道所有事情都一定係有黑幕,只不過今次呢件事最早嘅黑幕,就要追溯到冴島大河於 25 年前嘅「上野吉春襲撃事件」,當年冴島大河被指殺害 18 位上野誠和會成員而被判死刑。

劇情到底點樣演變、真相到底如何,就留待玩家自己摸索了。

 

又係你啊大吾!

 

今集仲有另一位著名演員遠藤憲一,不過自從睇完日劇《Dr. X》之後,對於遠藤嘅印象就一直係一個忠直傻更更嘅大叔,再次見到佢喺遊戲中做一個懶係惡死嘅警察,總有別一番搞笑嘅風味 LOL

 

 

劇本同原版係無變的,變的只有時代;《人龍 4 HD》除左喺畫面上面做左提昇之外,喺系統同環境方面基本上係無郁過的,你可以話佢原汁原味,亦都可以話佢懶,睇你點睇。不過,見到地下街仲係用緊 Nico Nico 廣告,真係有一種感慨!遊戲上架之時亦都係「ニコニコ動画(原宿)」開始營運,使用人數亦都不斷上揚嘅繁榮期呀!

 

 

咁除左谷村正義之外,呢個 HD 版仲有無咩明顯唔同?嗯,我好愛 SEGA,我亦好尊敬「人龍工作室」同埋名越製作人,不過,得罪講句,喂阿哥你個 HD 可唔可以做得全面少少?我見到你地將全部主角勁高清,個個變到皮光肉滑勁靚仔,但係,去到啲配角例如阿花,個樣就開始無咁高清;然後,我再望下啲路人、雜魚敵以及支線任務嘅 NPC……

 

 

嗚呀,點解非重要角色就個個都好似中左幅射咁嘅樣?呢啲係咪叫穿越?由 PS3 直接跳到 PS4?如果你話呢堆雜魚都有做 HD 嘅話,咁原版到底有幾樣衰……對唔住。

結果「想睇下啲 NPC 有幾樣衰」成為我玩呢個遊戲嘅一大樂趣。因為,呢個 HD,真係有少少 Hea 呀 Sorry……

至於環境上面,由於無幾耐之前先至玩完《人中木村》(Judge Eyes),所以我個腦入面仲係殘留住大量「2018 年嘅神室町」嘅印象;隔兩個月,回到一個 10 年前嘅神室町,感覺就好似回到過去重遊舊地咁樣,硬係有種「啊啊歲月~」嘅感嘆,呢份感覺我諗舊玩家會特別明顯。

 

去到《Judge Eyes》已經變成高質商廈嘅爛地,亦都係之後真島建築嘅發跡地 w

 

可以玩得返「搵儲物櫃鎖匙」我又幾開心的,而大受玩家歡迎嘅「水商售女公關育成」亦都喺遊戲中玩到當年嘅初模;至於唱 K 一向都係我鍾意玩嘅小遊戲,可以再次見到呢班阿叔一條友喺 K 房自 High 真係好治癒。

我自己認為舊玩家(除非有收集控)無太大必要重玩今次呢個 HD 版,至於無玩過原版嘅朋友,咁,淨係為左故事而玩都值得的,畢竟第一次遊玩遊戲嘅樂趣一定同我唔同,而回想起當年初玩《人龍 4》時,我的確係玩得好開心的。

最後送上 PS4 版 Trailer:

 

神婆

神婆 非典型占卜師,唔神秘,無形象,除了鐘意聽客人講故事,夜間興趣係打機睇動漫同玩貓;日系遊戲及 JRPG 專攻!

追蹤

Facebook 更多文章