今年又有薩爾達玩 《薩爾達傳說 夢見島》重製確定!

作為 Nintendo Switch 機主,應該個個都有一隻《薩爾達傳說:曠野之息》鎮家宅,雖然曾經比人誤會今集換咗主角,之不過有返咁上下機齡既朋友都知道其實成個系列都好正的!係今日既「Nintendo Direct 2019.2.14」線上發布會上面就正式宣布將會重製《薩爾達傳說 夢見島》(香港官方譯名:《薩爾達傳說 織夢島》),未接觸過呢隻遊戲既朋友一定要留意,因為《薩爾達傳說 夢見島》係被多本遊戲雜誌評為「史上最佳遊戲」,真正佳作黎!

 

《薩爾達傳說 夢見島》係 1993 年任記發行既 Game Boy 遊戲,屬於為攜帶型遊戲機開發既系列第一作,而且亦都係「薩爾達傳說系列」第四作。《薩爾達傳說 夢見島》雖然主角仍然係林克,不過故事舞台就並非發生係大家熟悉既海拉魯王國,屬系列中既少數。而且薩爾達公主呢個咁重要既人物都只係提過下咁樣,非常特別。

 

 

今集講述林克係經過《薩爾達傳說 眾神的三角神力》既磨練之後,繼續環遊世界進行更加艱苦既修行。係一場風暴中,林克坐既船被風暴吹到附近既「コホリント島」,呢個島係入得去就出唔到黎既不可思議島嶼。如果要離開呢個島,就必需集齊八件樂器,再叫醒沉睡係山頂巨蛋入面既守護者風之魚先得,然後旅程就此展開。(原作中如果玩家無死過既話會有特別畫面,唔知重製版會唔會保留呢)

另外同《薩爾達傳說:曠野之息》唔同,本作係用返 2D 平面方式遊玩,風格亦都偏向可愛。當然除咗 2D 版本,3D 版本官方都唔會放棄,因為之前佢地亦有提及過二個版本都會顧及。

 

 

《薩爾達傳說 織夢島》將於 2019 年正式上市,將會支援繁體中文,對應平台 Nintendo Switch。

五木

五木 動漫電玩宅,極愛金田一系列,擅長動作及策略遊戲

追蹤

更多文章