《FF15》遊戲雖然已經推出一段時間，但係有關消息依然不時有更新，不過呢啲消息就偏向負面，包括早前宣佈嘅四部曲 DLC《The Dawn Of The Future》結果爛尾收場、淨係出到 Ardyn 一個人嘅 DLC 之外，《FF 15》製作人田畑端先生亦都宣佈離開 SE……呢一連串嘅消息都頗令人擔心《FF 15》往後嘅動向。

雖然作為一個好早期就打爆《FF 15》嘅 FF Fans，我平心而論，佢嘅劇本寫得真係唔算特別出色，而各地唔少玩家都有類似感想，所以當初 SE 話《The Dawn Of The Future》呢系列 DLC 其實係隱藏住《FF 15》另一個可能性嘅結局之時，我係頗係期待的；到後來 DLC 宣佈「アラネア編」「ルナフレーナ編」「ノクティス編」都中止開發嘅時候，我好失望……

不過，SE 剛剛總算帶黎一個環保嘅好消息，雖然三位角色嘅 DLC 出唔成，不過其實佢地嘅劇本已經一早寫好，開發團隊好想比玩家睇到呢個「也許是大家想要見到的未來」嘅故事，所以官方決定將四個 DLC 嘅劇本以小說方式推出，名為《小説 FINAL FANTASY XV -The Dawn Of The Future-》，日本方面將於 4 月 25 日將小說上架，繁體中文版相信不日亦會於華語地區推出。

利申會買。我好想知道官方描繪嘅另一個「未來」係點樣嘅模樣。

至於相信會係《FF 15》最後一個 DLC 嘅《Episode Ardyn》亦宣佈於 2019 年 3 月 26 日上架，官方同時釋出動畫電影片段，或者會令大家對於呢個被王國以及歷史遺忘嘅男人，有更深一步嘅了解。

片長約 15 分鐘，各位朋友注意數據流量～