剛剛過去嘅 2019 年 2 月 22～24 日係第十届 C3AFA，而 VJGamer 好榮幸地協助 Bandai Namco Entertainment 舉辦《Mobile Suit Gundam Battle Operation 2》對戰大會活動；有留意我地 Facebook 專頁或者有親臨活動嘅朋友，或者已經留意到總編輯森麻喺活動上面擔任埋旁述嘅工作。

今次活動係《GBO》系列首次舉辦嘅公式交流會，而《GBO 2》嘅製作人藤山賢彥先生亦帶同團隊黎到香港出席活動，因為佢知道香港有好多高達遊戲系列嘅 Fans，佢相信今次係一個絕好機會，比玩家互相交流之餘，亦都可以親身向 C3 在場嘅新玩家介紹呢隻《GBO2》呢隻遊戲！

藤山先生三日活動都提早在場打點一切，準備迎接玩家們

三日《GBO2》對戰大會其實並唔係比賽，而係今次 Bandai 攤位嘅重點活動，推廣呢隻於 2018 年 7 月份已經於 PS Store 上架嘅線上遊戲。

《GBO2》係一隻基本遊玩免費嘅戰場技術型遊戲，課金可以抽機體、抽武器，不過，唔係話玩家課金課得多就會變無敵，除咗遊戲本身有高技術含量之外，遊戲亦都主打 6 VS 6 團戰，隊伍點樣分配機體（前攻、輔助）、點樣獲得據點、點樣合作擊破對方機體獲取高分數，係遊戲嘅重點玩法。

C3 活動今次使用嘅版本，係製作團隊為場地而特別改版嘅 3 VS 3 線下版本，來場玩家可以選用九部機體，例如蒼藍命運 2號機、魔蟹、高達、鐳射大炮等等，藤山先生話呢 9 部機都係佢精心（私心）揀出黎，希望就算係新手玩家都可以快速上手咁話。

三日都人頭湧湧，藤山先生話好開心！好多謝大家支持！

三日活動除左線上預先登記嘅玩家之外，官方見現場唔少朋友都蠢蠢欲試，藤山先生亦加開唔少現場即興對戰時段，比來場人士即刻報名；當然啦，為左平均分配隊伍，本身玩過嘅朋友就會同返老手對戰、新手玩家就同埋新手玩家試驗。

「最緊要大家玩得開心，咁我黎得就有價值了！」藤山先生笑言，「雖然唔知大家想唔想要，不過獲勝方可以獲得我嘅簽名板！」

無錯，對戰大會獎品係製作人簽名板、限量《GBO 2》暖水杯以及高達貼紙一張；有玩家得到禮物好開心，亦有玩家笑言「如果可以送埋遊戲裡面嘅金幣就更好了」，製作團隊話會同公司反映。

簽名板（編輯部都有一塊，多謝！）

部份得獎朋友嘅合照留影，多謝你地支持啊！

現場仲有超高實力隊伍，指名要挑戰製作團隊以及總編森麻！最後……佢地嬴左（笑）

對於玩家黎講，見到喜歡遊戲嘅製作人絕對係開心嘅！對戰大會每日係分時段進行，而時段以外時間就係開放比來客自由試玩，藤山先生以及佢嘅團隊非常友善幽默，亦非常玩得，有現場朋友話「可唔可以同你一隊？」或者「可唔可以挑你機！」藤山先生都樂於落場同玩家交流。

你睇下佢地幾有信心（但呢場佢地係輸嘅！）

好多遊戲活動都係喺日本或者海外進行，今次爭取到大部份《Gundam》開發 Team 黎到香港、成功搞到呢個《GBO 2》交流會，好多玩家都把握機會向藤山先生親身表達意見，例如係對系統嘅睇法、機體嘅性能等等，以上好多對話都係玩家直接同藤山先生直接表達，編輯部對各位朋友日文程度之高深感佩服！

由於《GBO 2》黎緊 3 月就會上更新，可以比玩家同朋友自己組隊遊玩，加上遊戲馬上亦會於日本舉行下一次公式對戰大會，所以我地從旁都見到製作團隊好用心去收取玩家意見，「希望下次更新值得大家期待」咁話。（藤山先生仲唔小心透露黎緊會有水戰！！）

現場亦都有唔少有趣事件發生，例如係有唔少小朋友黎試玩，當中最年輕嘅只有七歲，相信係受佢爸爸影響，已經對高達好有興趣；但係藤山先生聽到之後係咁笑，佢話「我記得我幫呢個遊戲 Set 嘅年齡係 12 歲以上先玩得……翻譯哥哥你不如當『佢七歲』呢一句無譯過比我聽？」惹來哄堂大笑。

就係呢位小朋友！多謝你黎試玩啊！

一連三日嘅《GBO 2》順利在笑語及掌聲中順利落幕，再次多謝 Bandai Namco Entertainment 願意舉辦今次呢個官方活動，亦都好多謝親切友善嘅藤山先生以及團隊成員嘅專業表現，最重要當然係多謝呢三日黎到現場參與嘅各位朋友們！你地嘅支持非常重要，要知道能夠喺香港舉辦官方認可甚至支持嘅活動，並唔係一件易事，我地都希望未來會有更多唔同活動機會與大家見面！

最後送上《GBO 2》官方 Trailer。遊戲已經於 PS Store 上架，基本免費下載遊玩！
【下載遊戲按這裡】