【遊戲感想】未玩過的朋友可以放心入坑《閃之軌跡 4》為首半部軌跡系列完美作結

 

《閃の軌跡》首集登場時間為 2014 年,以日文版作準的話,《閃》每年平均推出一集;而呢個系列黎到 2018 年,總算告一段落。

《閃軌 4》唔止係《閃》系列嘅最終章,話佢係成個《軌跡》故事嘅第一部完結應該更貼切;《軌跡》世界觀由 2004 年嘅《空之軌跡》開始,中間經歷《碧&零》,黎到《閃》,可以話係一個非常完整嘅三部曲。

 

 

喺呢三個系列裡面,玩家以三個唔同嘅出發點,慢慢走近事件嘅真相,所以《閃 4》備受非常多玩家 Fans 嘅期待,因為前兩部作品嘅角色、伏線,都會一口氣喺《閃 4》裡面說明同埋集合。

喺受期待嘅同時,相信 Falcom 亦都有好大壓力,到底點樣分配劇情、點樣去平衡各個角色嘅定位先最精彩?積累左 14 年(遊戲入面嘅時間就為 6 年左右 LOL)嘅各樣伏線同謎題,又點樣可以合理而圓滿地呈現比玩家同 Fans 睇?

作為一個《軌跡》嘅忠實 Fans,而《閃 4》作為三部曲嘅最終章,喺劇情上面嘅安排,我是滿足的,亦是感動的,絕對唔係淨係收貨咁簡單,我係真心好多謝 Falcom 為玩家帶來《軌跡》呢個咁精彩嘅遊戲。

 

 

《閃 1》之後,遊戲嘅系統操作黎到《閃 4》基本上已經發展完善,無咩大變化,係騎神戰次數增多,不過難度依然偏低。不過今集重點唔係個戰鬥系統好無玩,而係人太多,唔知用邊個好(笑)三代主角群呀,我已經唔想去數到底有幾多個角色可以於戰場上使用。

當然,見得兼用得返《空軌》嘅角色們,我相信大部份 Fans 同我一樣,係好開心的。

 

連已經死亡嘅「劍帝」都有提及到 O_Q

《空》《碧》主角集合出場同《閃》主角相會一刻,等於劇情正式交集了,個心好激動

騎神戰依然偏向簡單

 

因為知道好多朋友等緊 2019 年 3 月 7 日嘅《閃 4》中文版,所以呢篇感想我盡可能唔劇透大家。

《閃 4》開始嘅背景,正值埃雷波尼亞帝國皇帝被槍擊、鐵血宰相以及「緋紅騎神」皇子塞德利克皇子因此藉口對共和國宣戰之時,不過就算未玩落去都睇得出呢壇野係個陰謀……當然,呢件事只係契機,《閃 4》喺故事中,終於正式交代有關「七騎神」嘅來龍去脈、有關「黑之工房」嘅詳細資料等等。

 

 

有關故事發展,我只能夠講,《閃 4》其實有兩個結局,但係無論邊一個結局,都必須要有所犧牲。

14 年來,一眾角色陪伴玩家成長,大家一定對各位角色有住唔同嘅情感,不過,遊戲並無夾硬營造大團圓 BBQ 跳起 Yeah 式結局,要領便當嘅角色,或者喺故事中已經完成任務嘅角色,喺《閃 4》裡面都毫不猶豫地與玩家說了再見;如果你同我一樣對《軌跡》有著好深感情,或者你都要預備定幾張紙巾旁身。

 

 

至於好多玩家都一直感到好奇嘅結社「噬身之蛇」,我諗喺《閃 4》裡面出現嘅執行者應該係歷代最多最齊人,而相信「噬身之蛇」亦都係往後《軌跡》嘅重點之一。今集雖然終於平息大陸帝國嘅風波,但係「地下」嘅活動並未完結,呢個亦都係今集留下最大嘅伏線。

《空軌》經歷「福音計劃」,《閃軌》經歷「幻焰計劃」,但係呢兩個計劃目的為何,今集仲係未有好好解釋清楚;只不過結社盟主終於首次喺《閃 4》中露面,留下「世界離全滅於無只係剩返三年」一樣謎一般嘅言語,今集遊戲就告終了。

 

 

2018 年動漫節我有幸訪問 Falcom 社長近藤先生,當時佢就話「《閃軌》完左都只係講左成個故事大約三分二左右而已」(詳文按此),不過公司黎緊 2019 年會將重點暫時擺返去同社另一 IP《伊蘇》上面(《伊蘇 9》將於今年推出),所以《軌跡》至今都未正式說明嘅「永劫回歸計劃」,似乎要等多一排先至有機會睇後續了。

 

 

綜觀黎講,《閃 4》埋尾埋得幾好,與前作有唔少首尾呼應嘅地方,如果係鍾意玩 JRPG 嘅朋友,雖然《軌跡》故事好長,但係呢個故事絕對精彩,我強烈推薦各位落坑。

題外話:

我知道好多朋友未玩過《閃軌》,而即使 PlayStation 而家有哂全系列嘅中文版本,但係就算想落坑,或者你會諗「但係無玩過《空》及《碧&零軌》,我點樣開《閃》?」咁當然遊戲安排其實就好細心嘅,就算中途落坑都未至於會唔明個故事講乜。

不過,因為《閃 4》作為系列最終章,將會於 2019 年 3 月 7 日就推出繁體中文版,我亦都好希望自己有時間可以寫一篇由《空軌》到《閃軌》嘅簡單介紹文章……唔知又會唔會有讀者朋友想睇?或者,想寫比我地編輯部?XD

最後,送上遊戲宣傳片段:

 

神婆

神婆 非典型占卜師,唔神秘,無形象,除了鐘意聽客人講故事,夜間興趣係打機睇動漫同玩貓;日系遊戲及 JRPG 專攻!

追蹤

Facebook 更多文章