我地編輯部肝完《隻狼》之後，陸陸續續返去《The Division 2》等 8 人 Raid 更新，當我地努力地升裝備期間，外國已經有玩家係遊戲入面發現《The Division 2》暗藏彩蛋，而呢隻彩蛋正正就暗示住同廠另一大作《刺客教條》新作訊息！

圖片來源：Kotaku

今次呢個彩蛋係由 YouTuber JorRaptor 所發現，佢係《The Division 2》入面既「Potomac Event Center」牆上發現一幅叫做「Valhalla」既海報，海報上既人物著住《刺客教條》標誌性紅白色衫，同樣地係笠住個頭見唔到樣，而最神奇既係佢手持住「伊甸蘋果」！

圖片來源：Kotaku

而「Valhalla」呢個詞一般黎講都係代表北歐神話中既天堂、英靈神殿等。掌管戰爭、藝術同死者既主神奧丁命令女武神「Valkyrie」將陣亡既英靈戰士帶黎呢個地方享受永恆幸福。當戰士們係度嘆夠之後，佢地就會互相對戰練習打鬥既技巧，以面對諸神黃昏中最後既戰鬥。而維京人正正就係信奉北歐神話。

根據外媒 Kotaku 報導，佢地早係幾個月前，透過兩個獨立消息來源得知 2020 年推出既《刺客信條》將會以「王國」（Kingdom）命名，而主角將由維京人擔任。如果以上資料正確，到底點將故事由《刺客教條：奧德賽》拉到去維京時代，呢個設定齋諗都覺得過癮。