最騎呢四人對戰遊戲 《底褲派對》春季對決展開!

對戰遊戲大家就玩得多,但係用底褲黎互毆我諗你地連諗都未諗過。好快就會有隻叫做《底褲派對》(Panty Party)既遊戲推出,。顧名思義,遊戲最大既特色就係玩家們將操控底褲去互相廝殺(?!),官方早前仲特別為 Nintendo Switch 版做咗次試玩會,好鬼歡樂!

 

《底褲派對》係由台灣獨立遊戲製作團隊 AnimuGame 製作,係 2017 年時已經係 PC Steam 上發售。遊戲雖然係玩底褲,不過內容其實非常之健康,因為玩家所控制既底褲係由女子高中生變成既「戰士」(?!)。而呢啲底褲除咗基本既移動、攻擊、防禦、跳躍、突進外,每條底底都會有自己特殊技能,有啲識放 Laser 有啲會用刀斬人,玩法類似《Gundam VS》系列咁,最大支援四人對戰。

 

 

除咗對戰外遊戲仲有單人故事模式,描述女主角化身成「愛的戰士」後同敵人戰鬥,阻止敵人胖茲想對全人類洗腦,令人類愛上底褲既陰謀!係原版故事模式有 20 關,透過推進故事將可收集更多底底。

 

 

呢隻遊戲係 Steam 上面得到「極度好評」外,連外國知名 Youtuber PewDiePie 都曾經玩過呢隻 Game,過程中非常搞笑。有興趣既朋友記得留意啦,今年春季就會正式係 Nintendo Switch 上發售,而且 Switch 版仲新增主題曲同埋新「機體」,支援英文、日文、繁體中文等語言。

 

五木

動漫電玩宅,極愛金田一系列,擅長動作及策略遊戲

追蹤

更多文章