【絕不輕鬆】Netflix《輕鬆小熊與小薰》使用前導讀

復活節長假撞正 Netflix 上架嘅新動畫《輕鬆小熊與小薰》,大家可能都知《輕鬆小熊》其實係有繪本漫畫同埋一啲動畫短片,今次 Netflix 版係以定格動畫去製作,啫係大眾所講嘅 Stop Motion 動畫,不過用咩。每集其實 10 分鐘左右,如果大家睇啲預告覺得搞搞笑笑同繪本版差唔多就比定心理準備大家,今次動畫重點係放左喺繪本漫畫一直得吧聲或者背影嘅屋主小薰身上。

開頭都唔再交待輕鬆小熊(劇中叫拉拉熊)、小白熊小黃雞點嚟、點解會同小薰同一屋簷下,直接將故事主軸擺喺 25 歲東京 OL 生活當中。唔係話唔會有三隻得意角色嘅可愛情節,但小薰嘅 OL 生活先係最多篇幅嘅地方,仲要啲情節都幾入心入肺,當中係不斷提出一啲單身中女煩惱好似身形走樣、職場同事相處、友情、愛情、家人等等嘅現實問題,當然到最後實係返到屋企見到拉拉熊佢地就會諗通或者治癒。但請使用前留意,治癒前係會經歷些小嘅傷痛或者心酸,所以要有返相當嘅心理準備先好服用!

如果你上年睇過《衝吧烈子》,咁你都會打定底知道《輕鬆小熊與小薰》賣嘅唔係兒童輕鬆卡通。男士們如果你女友純粹覺得《輕鬆小熊》得意可愛,想睇下佢地喺人地屋企有咩搞笑生活嘅話,希望你睇到呢度會拎定包紙巾、準備杯暖水、坐喺佢身邊陪佢睇呢套《輕鬆小熊與小薰》啦。

 

阿九

阿九 打機 - 識少少;玩具 - 識少少;睇戲 - 識少少;動漫 - 識少少..... 買膠、派膠、分享膠!Only The Best Is Good Enough! Lego Enthusiast https://goo.gl/HRnxDW

追蹤

更多文章