【遊戲新聞】技術問題令新角色意外流出《Dead by Daylight》嚇到玩家奪命狂呼(!)

 

由 Behaviour Interactive 開發嘅《Dead By Daylight》雖然係 2016 年登場嘅作品,不過競技式玩法,以及多元化嘅角色技能,令到遊戲去到今日都仲有大量玩家熱烈捧場。

不過,官方早前就擺左個大烏龍,原本只係想推出遊戲更新檔案(Ver. 2.7.0),點知係程式錯誤定點,令到唔少玩家喺完成遊戲更新之後,居然見到官方仲未公佈嘅全新角色!

 

圖片來源 @Morf_UK

 

係咪有啲面善?無錯!佢就係《搞乜鬼奪命雜作》美國經典恐怖電影《奪命狂呼》入面嘅殺人鬼 Ghost!

 

 

哎呀呀,原本等到官方正式公佈時先宣佈角色,一定會為玩家帶來好多驚喜;而家玩家無啦啦發現呢個「秘密」,真係咪話唔失望,我地一齊黎睇下玩家發現呢一幕時嘅反應:

 

 

佢嗰一下攤手同埋表情,好似有聲咁;不過無諗到官方對於呢件事嘅回應,真係阿 Q 到不得了!官方嘅意思大概係「可以提早喺遊戲中發現到我地黎緊新角色嘅玩家,你地真係好幸運呀!所以而家你地就期待下先啦!」

唔信?一齊黎睇下原文:

 

 

好彩玩家又無真係因為呢件事而嬲,佢地馬上好積極地去推測新角色 Ghost 嘅能力係乜野,亦有朋友即刻走去重睇《Scream 奪命狂呼》電影黎做參考添!打機打到咁上心,證明大家都真係好熱愛呢個遊戲咁噃?根據我地推算,Ghost 應該有潛伏、靜音、尾行呢啲特性,不過點樣應用到遊戲當中,都要等正式推出先至知道。

有玩《Dead By Deadlight》 嘅朋友,呢個新角色又啱唔啱你口味呢?

 

 

神婆

神婆 非典型占卜師,唔神秘,無形象,除了鐘意聽客人講故事,夜間興趣係打機睇動漫同玩貓;日系遊戲及 JRPG 專攻!

追蹤

Facebook 更多文章