拳頭社終於出手 多間外媒報導《英雄聯盟》手遊版本開發中

雖然近年人氣開始下滑,但係《英雄聯盟》(League of Legends)仍然係全球最受歡迎遊戲之一,觀乎其他受歡迎遊戲,例如《PUBG》、《Fortnite》都推出手遊版本,而且成績仲唔錯。可能因為咁,Riot Game 終於忍唔住要推出自家版本既《英雄聯盟》手遊版啦!

 

外國多個媒體都紛紛報導同一單新聞,就係 Riots Game 同騰訊正在合作開發《英雄聯盟》手遊版本,並且已經開發咗大約有一年時間,但係就未有正式推出日期,不過就唔太可能於 2019 年內推出,而騰訊到目前為止亦都未有回應。

 

 

當然大家最想知道既就係遊戲玩法有無改變,要知道《英雄聯盟》係一隻幾講求操作技巧既遊戲,變成手遊後唔多唔少一定要作出簡化。據消息報導,遊戲畫面同基本玩法仍然係 MOBA 類型,但係就並非會依據手機版本黎作出修改,到時道具、裝備同角色等等都會同原版有所分別。

 

 

其實騰訊多年前已經向 Riot 提出推出手遊版既建議,但係遭到後者拒絕。然後騰訊就自己開發出玩法相近既《王者榮耀》(Honor of Kings)以及《傳說對決》(Arena of Valor)二隻遊戲,後者仲成日比啲唔熟書既人誤會係王者榮耀英文版 / 外國版,雖然二者都係由天美工作室製作,但實際上係二隻遊戲黎。而呢二款遊戲分別係亞洲唔同地區得到空前成功(前者主要玩家黎自中國),更成為全球收入最高既 MOBA 類遊戲之一。

 

《王者榮耀》(Honor of Kings)

《傳說對決》(Arena of Valor),其實只要係稍為玩過又或者做少少資料搜集就知道係二隻遊戲,只有唔識又扮識既人先會以二隻遊戲英文名都係 Arena of Valor 黎抵賴 (其實英文名都唔同的)

 

手遊市場巨大既吸金能力已經備多次證實,推出《英雄聯盟》手遊版本亦都非常合理,問題係點樣將 PC 原版本精細既操作簡化,而又不失技巧以及觀賞度(要知道睇 LOL 高手表演係好賞心悅目),相信係廠方需要要面對既最大難題。

 

五木

動漫電玩宅,極愛金田一系列,擅長動作及策略遊戲

追蹤

更多文章